சின்னத்திரை மற்றும் வெள்ளித்திரையில் தனது நகைச்சுவைக் கதாபாத்திரங்கள் மூலம் மக்கள் மனதில் நீங்கா இடம்பிடித்துள்ள நடிகை 'மைனா' நந்தினி, தான் இரண்டாவது முறையாகக் கர்ப்பமாக இருக்கும் மகிழ்ச்சியான செய்தியை உத்தியோகபூர்வமாக அறிவித்துள்ளார்.
சின்னத்திரை நடிகரான யோகேஸ்வரனைத் திருமணம் செய்துகொண்ட மைனா நந்தினிக்கு ஏற்கனவே துருவன் என்ற மகன் உள்ளார். இந்நிலையில், தமது திருமண நாளையொட்டி கணவர் யோகேஸ்வரன் மற்றும் மகன் துருவனுடன் இணைந்து எடுத்துக்கொண்ட நெகிழ்ச்சியான குடும்பப் புகைப்படத்தைத் தனது சமூக வலைத்தளப் பக்கத்தில் பகிர்ந்து இச்செய்தியை அவர் வெளியிட்டுள்ளார்.

குறித்த புகைப்படத்தில், மகன் துருவன் தனது இரு கைகளிலும் வயிற்றில் இருக்கும் குழந்தையின் அல்ட்ராசவுண்ட் ஸ்கேன் அறிக்கையைப் (Ultrasound scan report) பிடித்தபடி காணப்படுகின்றார். பின்னால் கணவர் யோகேஸ்வரன், நந்தினியின் கன்னத்தில் அன்போடு முத்தமிட, நந்தினி ஒரு கையால் கண்களை மூடியபடி வெட்கத்துடன் புன்னகைக்கும் இப்புகைப்படம் இணையத்தில் இரசிகர்களின் மனதைக் கவர்ந்துள்ளது. இந்த அறிவிப்பைத் தொடர்ந்து திரையுலகப் பிரபலங்களும் இரசிகர்களும் தம்பதியினருக்குத் தமது வாழ்த்துக்களைத் தெரிவித்து வருகின்றனர்.
விஜய் தொலைக்காட்சியில் ஒளிபரப்பான 'சரவணன் மீனாட்சி' தொடரில் நடித்த 'மைனா' கதாபாத்திரத்தின் ஊடாகப் பெருமளவில் பிரபலமடைந்த நந்தினி, இயக்குநர் பாண்டிராஜ் இயக்கிய 'வம்சம்' திரைப்படத்தின் மூலம் வெள்ளித்திரையில் அறிமுகமானார்.
தொடர்ந்து கேடி பில்லா கில்லாடி ரங்கா, தலைவன் தலைவி, சர்தார், விருமன், அன்பறிவு, அரண்மனை 3, மூக்குத்தி அம்மன் 2 உள்ளிட்ட பல வெற்றித் திரைப்படங்களில் நகைச்சுவை வேடங்களில் நடித்து வரும் நிலையில், தற்போது அவரது தனிப்பட்ட வாழ்க்கையிலும் இப்புதிய மகிழ்ச்சி இணைந்துள்ளது.