இன்ஸ்டாகிராமில் விளம்பரப்படுத்தப்பட்ட அழகுசாதனப் பொருளைப் பயன்படுத்திய 17 வயது சிறுமிக்குக் கடுமையான சிறுநீரகப் பாதிப்பு

இந்தியாவின் கேரள மாநிலத்தில் இன்ஸ்டாகிராம் (Instagram) சமூக வலைத்தளம் ஊடாகப் பிரபலமான சருமத்தை வெண்மையாக்கும் அழகுசாதனப் பொருளைப் (Fairness cream) பயன்படுத்திய 17 வயதுடைய சிறுமி ஒருவர், கடுமையான சிறுநீரகத் தொற்றினால் பாதிக்கப்பட்டு வைத்தியசாலையில் அனுமதிக்கப்பட்டுள்ளார்.

இன்ஸ்டாகிராம் ரீல்ஸ் (Reels) காணொளிகளால் ஈர்க்கப்பட்ட குறித்த சிறுமி, இணையவழி ஊடாக இந்தக் க்ரீமைக் கொள்வனவு செய்துள்ளார். ஆரம்பத்தில் அதனைப் பயன்படுத்தியபோது சருமத்தில் மாற்றம் தெரிந்தமையால், தொடர்ச்சியாக ஓராண்டு காலத்திற்கு அதனை வாங்கிப் பயன்படுத்தி வந்துள்ளார்.

இந்நிலையில், அண்மையில் அவரது உடல்நிலையில் பாரிய மாற்றங்கள் ஏற்பட்டுள்ளன. இரத்த அழுத்தக் குறைபாடு, மயக்கம் மற்றும் கால்களில் வீக்கம் ஆகிய அறிகுறிகள் தென்பட்டதையடுத்து, சிறுமிக்குக் கடுமையான சிறுநீரகப் பாதிப்பு ஏற்பட்டிருப்பது கண்டறியப்பட்டது. உடனடியாக அவர் தனியார் வைத்தியசாலையொன்றில் அனுமதிக்கப்பட்டு சிகிச்சை அளிக்கப்பட்டபோது, சிறுமியின் உடலில் பாதரசத்தின் (Mercury) அளவு மிக அதிகமாக இருந்தமை தெரியவந்துள்ளது.

இதற்குச் சிறுமி பயன்படுத்திய குறித்த அழகுசாதனக் க்ரீமே காரணம் என வைத்தியர்கள் உறுதிப்படுத்தியுள்ளனர். அக்க்ரீமில் அனுமதிக்கப்பட்ட அளவை விட மிக அதிகமாக, 12,500 பி.பி.எம் (PPM) அளவில் பாதரசம் கலந்திருந்தமை பரிசோதனைகளில் கண்டறியப்பட்டுள்ளது.

தனது உடல்நிலை மோசமடைந்தது குறித்து குறித்த நிறுவனத்திடம் சிறுமி முறையிட்டபோது, உயரதிகாரிகளிடம் பேசுவதாகப் பதிலளித்த அவர்கள் அதன் பின்னர் எவ்வித பதிலையும் வழங்கவில்லை எனக் கூறப்படுகிறது. இதனைத் தொடர்ந்து, சம்பந்தப்பட்ட நிறுவனம் மீது சட்ட நடவடிக்கை எடுக்கச் சிறுமியின் பெற்றோர் தீர்மானித்திருந்த நிலையில், கேரள சிறுவர் உரிமைகள் பாதுகாப்பு ஆணையம் இவ்விடயத்தில் தாமாக முன்வந்து வழக்குப் பதிவு செய்துள்ளது.

சமூக வலைத்தளங்கள் மற்றும் இணையத்தள விளம்பரங்களைப் பார்த்து இவ்வாறான அழகுசாதனப் பொருட்களைப் பயன்படுத்துவதைப் பொதுமக்கள் முற்றாகத் தவிர்க்க வேண்டும் எனவும், சரும நோய் நிபுணர்களின் ஆலோசனையைப் பெற்ற பின்னரே சிகிச்சைகளை மேற்கொள்ள வேண்டும் எனவும் வைத்தியர்கள் அறிவுறுத்தியுள்ளனர்.