டி20 உலகக்கோப்பையில் இலங்கைக்கு அதிர்ச்சி: காயம் காரணமாக ஹசரங்கா தொடரிலிருந்து விலகல்
ஹசரங்க இல்லாத நிலையில், சுழற்பந்து வீச்சின் முக்கிய பொறுப்பு மகேஷ் தீக்ஷன மீது விழுந்துள்ளது. ஹசரங்கவின் இடத்தை மாற்று வீரர்கள் நிரப்புவார்களா என்பது அடுத்த போட்டிகளில் தெரிய வரும் என ரசிகர்கள் எதிர்பார்த்து வருகின்றனர்.
2026 டி20 உலகக்கோப்பைத் தொடரை வெற்றியுடன் தொடங்கியுள்ள இலங்கை அணிக்கு பெரிய பின்னடைவு ஏற்பட்டுள்ளது. அணியின் முக்கிய சுழற்பந்து வீச்சாளரான வனிந்து ஹசரங்க காயம் காரணமாக தொடரிலிருந்து முழுமையாக விலகியுள்ளார். சொந்த மண்ணில் சிறப்பாக செயல்பட இலங்கை அணி எதிர்பார்த்திருந்த நிலையில், இந்த சம்பவம் அணிக்கு பெரும் சோதனையாக அமைந்துள்ளது.
கொழும்பில் நடைபெற்ற அயர்லாந்து அணிக்கு எதிரான முதல் போட்டியின் போது ஹசரங்கவுக்கு இடது காலில் தசைப்பிடிப்பு ஏற்பட்டதாக கூறப்படுகிறது. பந்துவீசும் போது வலி இருந்தபோதிலும், அணியின் நலனைக் கருத்தில் கொண்டு அவர் தனது நான்கு ஓவர்களையும் முழுமையாக வீசியுள்ளார். அந்த போட்டியில் 25 ரன்கள் மட்டும் விட்டுக்கொடுத்து 3 முக்கிய விக்கெட்டுகளை கைப்பற்றி அணியின் வெற்றியில் முக்கிய பங்கு வகித்தார்.
போட்டிக்குப் பின்னர் அவருக்கு எம்.ஆர்.ஐ பரிசோதனை மேற்கொள்ளப்பட்டது. அதில் காலில் ஏற்பட்ட தசைநார் காயம் முழுமையாக குணமடைய குறைந்தது நான்கு வாரங்கள் தேவைப்படும் என மருத்துவர்கள் தெரிவித்துள்ளனர். உலகக்கோப்பை தொடரின் காலக்கெடு காரணமாக, அவர் மீதமுள்ள போட்டிகளில் விளையாட முடியாது என அறிவிக்கப்பட்டுள்ளது.
ஹசரங்கவுக்குப் பதிலாக 31 வயதான சுழற்பந்து வீச்சாளர் துஷான் ஹேமந்த அணியில் சேர்க்கப்பட்டுள்ளார். இவர் இதுவரை இலங்கை அணிக்காக குறைந்த அளவிலான சர்வதேச போட்டிகளில் மட்டுமே விளையாடியுள்ளார்.
டி20 உலகக்கோப்பை வரலாற்றில் அதிக விக்கெட்டுகளை எடுத்த வீரர்களில் முன்னணி இடத்தில் உள்ள ஹசரங்க இல்லாதது இலங்கை அணிக்கு பெரிய இழப்பாக பார்க்கப்படுகிறது. அடுத்த கட்ட போட்டிகளில் இலங்கை அணி ஓமன், ஆஸ்திரேலியா மற்றும் ஜிம்பாப்வே அணிகளை எதிர்கொள்ள உள்ளது.
ஹசரங்க இல்லாத நிலையில், சுழற்பந்து வீச்சின் முக்கிய பொறுப்பு மகேஷ் தீக்ஷன மீது விழுந்துள்ளது. ஹசரங்கவின் இடத்தை மாற்று வீரர்கள் நிரப்புவார்களா என்பது அடுத்த போட்டிகளில் தெரிய வரும் என ரசிகர்கள் எதிர்பார்த்து வருகின்றனர்.
