கிழக்கு உக்ரைனில் பயணிகள் பஸ்கள் மீது ரஷ்யா நடத்திய  தாக்குதலில் 33 பேர் உயிரிழப்பு: பலர் காயம்

கிழக்கு உக்ரைனில் உள்ள டொனெட்ஸ்க் பிராந்தியத்தின் கிராமடோர்ஸ்க் நகரில் வியாழக்கிழமை ரஷ்யப் படைகள் மேற்கொண்ட தாக்குதலில் இரண்டு பொதுப் பயணிகள் பஸ்கள் தீக்கிரையானதில் குறைந்தது 33 பேர் உயிரிழந்துள்ளனர். 

மேலும் 18 பேர் படுகாயமடைந்துள்ளதாக உள்ளூர் அதிகாரிகள் உறுதிப்படுத்தியுள்ளனர். இந்த ஆண்டில் உக்ரைனில் இடம்பெற்ற மிக மோசமான தனிநபர் தாக்குதலாக இது பதிவாகியுள்ளதுடன், சம்பவத்தை அடுத்து அப்பகுதியில் பொதுப் போக்குவரத்து சேவைகள் இடைநிறுத்தப்பட்டு மக்கள் பாதுகாப்பான இடங்களுக்குச் செல்லுமாறு அறிவுறுத்தப்பட்டுள்ளனர்.

ரஷ்யப் படைகள் வேண்டுமென்றே பொதுமக்களை இலக்கு வைத்து இத்தாக்குதலை மேற்கொண்டுள்ளதாக டொனெட்ஸ்க் பிராந்திய இராணுவ நிர்வாகத்தின் தலைவர் வடிம் பிலாஷ்கின் குற்றம் சாட்டியுள்ளார். ஒரே தாக்குதலில் அதிக எண்ணிக்கையிலான பொதுமக்களைக் கொல்லும் நோக்குடனேயே பயணிகள் நிறைந்த பஸ்களை அவர்கள் இலக்கு வைத்துள்ளதாகவும், ரஷ்யா உக்ரைன் மண்ணில் தொடர்ச்சியாக பாரிய குற்றங்களை இழைத்து வருவதாகவும் அவர் தெரிவித்தார்.

தாக்குதலின் தாக்கத்தால் இரண்டு பஸ்களும் அதனைச் சூழவுள்ள பகுதிகளும் தீப்பிடித்து எரிந்ததாக உக்ரைனின் அரச அவசரகால சேவைப் பிரிவு தெரிவித்துள்ளது. காயமடைந்தவர்களை மீட்கும் பணியில் ஈடுபட்டிருந்த பொலிஸ் உத்தியோகத்தர்களை இலக்கு வைத்தும் ரஷ்யாவின் ஆளில்லா விமானங்கள் தாக்குதல் நடத்தியதாக டொனெட்ஸ்க் பொலிஸார் குறிப்பிட்டுள்ளனர். 

சடலங்கள் சிதறிக்கிடந்ததால் பலரது அடையாளங்களைக் கண்டறிவதில் பொலிஸார் கடும் சவால்களை எதிர்நோக்கியுள்ளனர். பாதுகாப்பு நிலைமைகளைக் கருத்திற்கொண்டு கிராமடோர்ஸ்க் மற்றும் ஸ்லோவியான்ஸ்க் நகரங்களுக்கான பொதுப் போக்குவரத்தை உடனடியாக இடைநிறுத்தியுள்ளதாக நிர்வாகம் அறிவித்துள்ளதுடன், டொனெட்ஸ்க் பிராந்தியத்தில் உள்ள பொதுமக்கள் உடனடியாக வெளியேறுமாறு கேட்டுக்கொள்ளப்பட்டுள்ளனர்.

இக்கொடூர தாக்குதல் ஒருபுறமிருக்க, உக்ரைன் தூதுக்குழுவினர் பேச்சுவார்த்தைகளுக்காக அமெரிக்கா பயணமாகவுள்ளனர். அமெரிக்கத் தூதுவர் ஸ்டீவ் விட்கோப் மற்றும் அமெரிக்க ஜனாதிபதி டொனால்ட் ட்ரம்பின் மருமகன் ஜாரெட் குஷ்னர் ஆகியோரை உக்ரைனின் புலனாய்வுப் பிரிவுத் தலைவர் ருஸ்டெம் உமெரோவ் மற்றும் ஜனாதிபதியின் அலுவலகத் தலைவர் கிரிலோ புடானோவ் ஆகியோர் சந்திக்கவுள்ளனர். இந்த இரு நாள் பேச்சுவார்த்தையின் போது உக்ரைனின் வான் பாதுகாப்பு கட்டமைப்பு தொடர்பில் முக்கிய கவனம் செலுத்தப்படும் என ஜனாதிபதி வொலோடிமிர் செலென்ஸ்கி தெரிவித்துள்ளார்.

உக்ரைன் போர் தற்போது அபாயகரமான ஒரு முட்டுக்கட்டையை எட்டியுள்ளதாகவும், அமைதியான தீர்வை எட்டுவதற்கே வொஷிங்டன் தொடர்ந்தும் முன்னுரிமை அளிக்கும் என்றும் அமெரிக்க இராஜாங்கச் செயலாளர் மார்கோ ரூபியோ போர்த்துக்கல்லில் வைத்துத் தெரிவித்தார். அவரது இக்கருத்தை கிரெம்ளின் பேச்சாளர் டிமிட்ரி பெஸ்கோவும் ஏற்றுக்கொண்டுள்ளதுடன், அமைதிக்கான வழிகளைக் கண்டறிவது இராஜதந்திரிகளின் பொறுப்பு என சுட்டிக்காட்டியுள்ளார்.

முன்னரங்கப் பகுதிக்கு மிக அருகில் அமைந்துள்ள முக்கிய தொழிற்துறை நகரங்களான கிராமடோர்ஸ்க் மற்றும் ஸ்லோவியான்ஸ்க் என்பன உக்ரைனின் பாதுகாப்புக் கோட்டையாக இருந்து வருகின்றன. எனினும், கடுமையான எறிகணை மற்றும் விமானத் தாக்குதல்கள் காரணமாக இப்பகுதிகள் தொடர்ச்சியாக பலவீனமடைந்து வருவதாக களநிலவரங்கள் தெரிவிக்கின்றன.