ஐசிசி ஒருநாள் உலகக் கிண்ணம் 2027: இந்தியா மற்றும் பாகிஸ்தான் பலப்பரீட்சை எப்போது? போட்டி அட்டவணை வெளியானது   

சர்வதேச கிரிக்கெட் பேரவை நடத்தும் 2027 ஆம் ஆண்டுக்கான ஐசிசி ஆடவர் ஒருநாள் உலகக் கிண்ணத் தொடருக்கான உத்தியோகபூர்வ போட்டி அட்டவணை வெளியிடப்பட்டுள்ளது.

ரசிகர்களால் பெரிதும் எதிர்பார்க்கப்படும் இந்தியா மற்றும் பாகிஸ்தான் அணிகளுக்கு இடையிலான வரலாற்றுச் சிறப்புமிக்க லீக் ஆட்டம் அடுத்த ஆண்டு ஒக்டோபர் 10 ஆம் திகதி ஞாயிற்றுக்கிழமை ஜோஹன்னஸ்பேர்க்கில் நடைபெறவுள்ளதுடன், இப்போட்டி இந்திய நேரப்படி பிற்பகல் 1.30 மணிக்கு ஆரம்பமாகவுள்ளது.   

இந்திய அணி தனது குழுநிலைப் பயணத்தை ஒக்டோபர் 7 ஆம் திகதி நடப்புச் சம்பியனான அவுஸ்திரேலியாவுக்கு எதிரான பலப்பரீட்சையுடன் கேப் டவுனில் ஆரம்பிக்கிறது.

அதனைத் தொடர்ந்து ஒக்டோபர் 10 ஆம் திகதி பாகிஸ்தானையும், ஒக்டோபர் 14 ஆம் திகதி ஆப்கானிஸ்தானையும் இந்திய அணி எதிர்கொள்ளவுள்ளது. பின்னர் ஒக்டோபர் 17 ஆம் திகதி தகுதிச்சுற்று மூலமாகத் தேர்வாகும் அணியுடனும், ஒக்டோபர் 24 ஆம் திகதி விக்டோரியா ஃபால்ஸில் ஜிம்பாப்வே அணியுடனும் இந்தியா மோதவுள்ளது.   

இத்தொடரின் ஏ பிரிவில் இந்தியா, பாகிஸ்தான், அவுஸ்திரேலியா, ஆப்கானிஸ்தான், ஜிம்பாப்வே மற்றும் தகுதிபெறும் அணி ஆகியவை இடம்பெற்றுள்ளன. அதேவேளை பி பிரிவில் தென்னாபிரிக்கா, இங்கிலாந்து, இலங்கை, நியூசிலாந்து, பங்களாதேஷ் மற்றும் தகுதிபெறும் மற்றொரு அணி ஆகியவை களம் காண்கின்றன.

குழுநிலை ஆட்டங்களின் முடிவில் இரு அணிகளும் அடுத்த சுற்றான சுப்பர் 7 நிலைக்கு முன்னேறும் பட்சத்தில், இந்தியா மற்றும் பாகிஸ்தான் அணிகள் நவம்பர் 7 ஆம் திகதி கேப் டவுன் மைதானத்தில் மீண்டும் நேருக்கு நேர் மோதும் வாய்ப்பு உருவாகும்.   

சுப்பர் 7 சுற்றுத் திட்டமிடலின்படி, இந்திய அணி ஒக்டோபர் 28 ஆம் திகதி அவுஸ்திரேலியாவுடனும், ஒக்டோபர் 31 ஆம் திகதி தென்னாபிரிக்காவுடனும் பலப்பரீட்சை நடத்தும்.

தொடர்ந்து நவம்பர் 4 ஆம் திகதி நியூசிலாந்து அணியையும், நவம்பர் 11 ஆம் திகதி இங்கிலாந்து அணியையும் இந்தியா எதிர்கொள்ளும். இத்தொடரின் முதலாவது அரையிறுதி ஆட்டம் நவம்பர் 17 ஆம் திகதி கேப் டவுனிலும், இரண்டாவது அரையிறுதி ஆட்டம் நவம்பர் 18 ஆம் திகதி ஸ்வானே நகரிலும் நடைபெறவுள்ளன.

இறுதியாக மகுடத்துக்கான மாபெரும் இறுதிப் போட்டி நவம்பர் 21 ஆம் திகதி ஜோஹன்னஸ்பேர்க்கில் அரங்கேறவுள்ளது.