ஈரான் முன்மொழிந்த ஒப்பந்தத்தை டிரம்ப் நிராகரித்ததால் உலக சந்தையில் கச்சா எண்ணெய் விலை திடீர் உயர்வு
ஹோர்முஸ் நீரிணையை திறக்க ஈரான் வழங்கிய அமைதி உடன்படிக்கையை அமெரிக்க ஜனாதிபதி டொனால்ட் டிரம்ப் நிராகரித்ததை அடுத்து, உலக சந்தையில் கச்சா எண்ணெய் விலை மீண்டும் உயர்வடைந்துள்ளது.
மூலோபாய முக்கியத்துவம் வாய்ந்த ஹோர்முஸ் நீரிணையை மீண்டும் திறந்து கப்பல் போக்குவரத்தை வழமைக்குக் கொண்டுவருவதற்காக ஈரான் முன்வைத்த அமைதி உடன்படிக்கையை அமெரிக்க ஜனாதிபதி டொனால்ட் டிரம்ப் திட்டவட்டமாக நிராகரித்துள்ளார்.
இதனைத் தொடர்ந்து சர்வதேச சந்தையில் கச்சா எண்ணெய் விலைகள் மீண்டும் குறிப்பிடத்தக்க அளவில் உயர்வடைந்துள்ளதாக சர்வதேச ஊடகங்கள் செய்தி வெளியிட்டுள்ளன.
மத்திய கிழக்கு பிராந்தியத்தில் ஏற்பட்டுள்ள இந்த இராஜதந்திர முட்டுக்கட்டை காரணமாக சர்வதேச எரிபொருள் சந்தையில் விநியோகத் தட்டுப்பாடு ஏற்படும் என்ற அச்சம் மீண்டும் அதிகரித்துள்ளது.
இதன் தாக்கமாக அமெரிக்காவின் டபிள்யூ.ரி.ஐ (WTI) ரக கச்சா எண்ணெய் பீப்பாய் ஒன்றின் விலை 1.08 வீதத்தால் உயர்வடைந்து 93.47 அமெரிக்க டொலர்களாகப் பதிவாகியுள்ளது.
அதேவேளை சர்வதேச சந்தையின் முன்னணி குறியீடான பிரெண்ட் (BRENT) ரக கச்சா எண்ணெய் பீப்பாய் ஒன்றின் விலை 1.60 வீத உயர்வைக் கண்டு 105 அமெரிக்க டொலர்களை எட்டியுள்ளது.
ஹோர்முஸ் நீரிணை ஊடான வர்த்தகப் பாதையை உடனடியாக திறப்பதற்கான சாத்தியக்கூறுகள் மங்கியுள்ளதால், சர்வதேச சந்தையில் எண்ணெய் விலைகள் மேலும் நிலையற்ற தன்மையை எதிர்கொள்ளக்கூடும் என சந்தை ஆய்வாளர்கள் எச்சரித்துள்ளனர்.
