தோனியாக சஞ்சு சாம்சன் மாற தேவையில்லை... கம்பீர் அதிரடி பேச்சு... என்ன நடந்தது?
மூன்றாவது முறையாக டி20 உலகக்கோப்பையை இந்திய அணி வென்று வரலாற்றுச் சாதனை படைத்துள்ள நிலையில், தொடர் நாயகன் விருது வென்ற சஞ்சு சாம்சனுக்கு பலரும் பாராட்டு தெரிவித்து வருகின்றனர்.
இந்த நிலையில், சஞ்சு சாம்சனை 'அடுத்த எம்.எஸ் தோனி' என்று தான் ஒருமுறை கூறியதையும், அதற்கு தற்போதைய தலைமைப் பயிற்சியாளர் கௌதம் கம்பீர் அளித்த பதிலையும் காங்கிரஸ் எம்.பி சசி தரூர் தற்போது பொதுவெளியில் பேசி உள்ளார்.
"நான் முதன்முதலில் சஞ்சு சாம்சனை சந்திக்கும் போது அவருக்கு 14 வயது. சிறந்த விக்கெட் கீப்பிங் மற்றும் பேட்டிங் திறமையுடன் காணப்பட்ட அவரிடம், நீ தான் அடுத்த தோனி என்று நான் கூறினேன். அவர் இன்று அடைந்துள்ள உச்சத்தைப் பார்க்கும்போது எனக்கு மிகவும் பெருமையாக இருக்கிறது".
ஆனால், பல ஆண்டுகளுக்கு முன்பு "சஞ்சு சாம்சன் மற்றொரு தோனியாக மாற வேண்டிய அவசியமில்லை, அவர் தனக்கான தனித்துவமான அடையாளத்தை உருவாக்குவார். அவர் இணையற்ற ஒரே ஒரு சஞ்சு சாம்சனாகவே இருப்பார் என்று கம்பீர் என்னிடம் கூறினார். கம்பீர் சொன்னது போலவே சாம்சன் தன்னை நிரூபித்துக் காட்டியுள்ளார்" என்று சசி தரூர் கூறியுள்ளார்.
2020 ஆம் ஆண்டில் சாம்சனை இந்தியாவின் சிறந்த இளம் விக்கெட் கீப்பர் பேட்ஸ்மேன் என கம்பீர் புகழ்ந்திருந்தார். டி20 உலகக்கோப்பைக்கு முன்பாக மோசமான ஃபார்மில் இருந்த சாம்சன், சூப்பர் 8 சுற்றில் ஜிம்பாப்வே அணிக்கு எதிரான வாழ்வா சாவா போட்டியில் களமிறங்கிச் சிறப்பான ஆட்டத்தை வெளிப்படுத்தினார்.
தொடர்ந்து வெஸ்ட் இண்டீஸ், இங்கிலாந்து மற்றும் நியூசிலாந்து அணிகளுக்கு எதிரான போட்டிகளில் தொடர்ந்து 3 அரைசதங்கள் விளாசி இந்திய அணி கோப்பையைத் தக்கவைக்க முக்கியக் காரணமாகத் திகழ்ந்தார்.
ராஜஸ்தான் ராயல்ஸ் அணியின் கேப்டனாகவும் பல ஆண்டுகள் சிறப்பாகச் செயல்பட்ட சஞ்சு சாம்சன், தனது திறமையை நிரூபித்து இந்திய அணியின் தவிர்க்க முடியாத வீரராக மாறி உள்ளார்.
