முன்னாள் ஜனாதிபதி மஹிந்த ராஜபக்ஷவின் புதல்வரான யோஷித ராஜபக்ஷ மற்றும் அவரது பாட்டியான டெய்சி ஃபொரஸ்ட் ஆகியோருக்கு எதிராகப் பணச்சலவை தடுப்புச் சட்டத்தின் கீழ் தாக்கல் செய்யப்பட்டுள்ள வழக்கின் முன் விசாரணையை எதிர்வரும் நவம்பர் மாதம் 03 ஆம் திகதி நடத்துமாறு கொழும்பு மேல் நீதிமன்றம் உத்தரவிட்டுள்ளது.
குறித்த வழக்கு இன்றைய தினம் நீதிமன்றில் விசாரணைக்கு எடுத்துக்கொள்ளப்பட்ட போது, பிரதிவாதியான யோஷித ராஜபக்ஷ நேரில் முன்னிலையாகியிருந்தார்.
அதேவேளை, வழக்கின் இரண்டாவது பிரதிவாதியான டெய்சி ஃபொரஸ்ட் இன்றைய தினம் நீதிமன்றில் முன்னிலையாகவில்லை. அவர் சார்பில் முன்னிலையான ஜனாதிபதி சட்டத்தரணி அனில் சில்வா, அவரது மருத்துவ அறிக்கையை நீதிமன்றத்தில் சமர்ப்பித்தார்.
முன்வைக்கப்பட்ட விடயங்களை ஆராய்ந்த மேல் நீதிமன்ற நீதிபதி, இந்த வழக்கு தொடர்பான வழக்கு முன் விசாரணையை நவம்பர் மாதம் 03 ஆம் திகதிக்கு அழைக்குமாறு உத்தரவிட்டார்.
சட்டவிரோதமான வழிகளில் ஈட்டப்பட்டதாகக் கூறப்படும் சுமார் 57 மில்லியன் ரூபா நிதியை மூன்று வங்கிக் கணக்குகளில் வைப்பிலிட்டதன் மூலம், பணச்சலவை தடுப்புச் சட்டத்தின் கீழ் குற்றமிழைத்துள்ளதாகக் குற்றம் சுமத்தி சட்டமா அதிபரினால் யோஷித ராஜபக்ஷ மற்றும் டெய்சி ஃபொரஸ்ட் ஆகியோருக்கு எதிராக இந்த வழக்கு தாக்கல் செய்யப்பட்டுள்ளது.
