பிரித்தானியாவின்  விமானப்படை தளத்திலிருந்து குண்டுவீச்சு விமானங்களை வாபஸ் பெற்ற அமெரிக்கா

பிரித்தானிய பயங்கரவாத எதிர்ப்புப் பொலிஸாரால் விசாரணைக்கு உட்படுத்தப்பட்டு வரும் ஆர்ஏஎப் பெயர்போர்ட் இராணுவ தளத்திலிருந்து அமெரிக்கா தனது அனைத்து குண்டுவீச்சு விமானங்களையும் முழுமையாக மீளப்பெற்றுள்ளது. 

குறித்த விமானப்படை தளத்தில் நிலைகொண்டிருந்த அனைத்து குண்டுவீச்சு விமானங்களும் அமெரிக்காவில் உள்ள அவற்றின் சொந்த தளங்களுக்கு மீண்டும் கொண்டு செல்லப்பட்டுள்ளதாக அமெரிக்க திணைக்கள அதிகாரி ஒருவர் ஞாயிற்றுக்கிழமை உறுதிப்படுத்தியுள்ளார்.

இந்த திடீர் வாபஸ் பெறுதலுக்கான நேரடிக் காரணத்தை அமெரிக்கா உத்தியோகபூர்வமாக அறிவிக்காத போதிலும், கடந்த செப்டெம்பர் 27ஆம் திகதி க்ளூசெஸ்டர்ஷையர் பகுதியில் அமைந்துள்ள இந்த விமானப்படை தளத்திற்கு அருகில் இடம்பெற்ற பாரதூரமான சம்பவத்தைத் தொடர்ந்தே இந்நடவடிக்கை முன்னெடுக்கப்பட்டுள்ளது. 

தளத்திற்கு அருகில் காணப்பட்ட மூன்று சந்தேகத்திற்கிடமான வாகனங்கள் தொடர்பாக பொலிஸாருக்கு தகவல் வழங்கப்பட்டதைத் தொடர்ந்து தீவிர விசாரணைகள் ஆரம்பிக்கப்பட்டன.

இச்சம்பவம் தொடர்பில் பயங்கரவாத குற்றச்சாட்டின் பேரில் ஆரம்பத்தில் ஐந்து நபர்கள் கைது செய்யப்பட்டு பின்னர் பொலிஸ் பிணையில் விடுவிக்கப்பட்டனர். 

அதனைத் தொடர்ந்து பிரித்தானிய மற்றும் ஈரானிய இரட்டைக் குடியுரிமை கொண்ட ஆறாவது நபர் ஒருவரும் கைது செய்யப்பட்டு பின்னர் பிணையில் விடுவிக்கப்பட்டிருந்தார். பெயர்போர்ட் தளத்தில் இடம்பெற்ற சம்பவத்தின் பின்னணியிலேயே வாஷிங்டன் இந்த தீர்மானத்தை எடுத்துள்ளமையை பிரித்தானிய அரசாங்க வட்டாரங்கள் மறுக்கவில்லை.

அரசியல் ரீதியான தீர்மானமாக அன்றி, இராணுவத்தின் செயற்பாட்டு மட்டத்தில் எடுக்கப்பட்ட ஒரு முடிவாகவே இது அமைந்திருப்பதாகவும், அது பிரித்தானிய இராணுவத் தரப்பிற்கு உத்தியோகபூர்வமாக அறிவிக்கப்பட்டுள்ளதாகவும் தெரிவிக்கப்படுகிறது. எனினும் இது தொடர்பாக பிரித்தானிய பாதுகாப்பு அமைச்சு எவ்வித கருத்துக்களையும் வெளியிடவில்லை.

இச்சம்பவத்தில் ஈரானின் தொடர்பு இருப்பதற்கான வலுவான அறிகுறிகள் காணப்படுவதாக பிரதமர் அண்டி பேர்ன்ஹம் சம்பவத்தின் சில நாட்களுக்குப் பின்னர் தெரிவித்திருந்த போதிலும், மேலதிக விபரங்கள் எதனையும் அவர் வெளியிடவில்லை. அதேவேளை, இந்த சம்பவத்தில் தமக்கு எவ்வித தொடர்பும் இல்லை என தெஹ்ரான் திட்டவட்டமாக மறுத்துள்ளது.