நிகழ்நிலை உடனடி கடன் செயலிகள் குறித்து பொதுமக்களுக்கு இலங்கை காவல்துறை எச்சரிக்கை

இணையதளங்கள் மற்றும் கையடக்கத் தொலைபேசி செயலிகள் வாயிலாக வழங்கப்படும் நிகழ்நிலை உடனடி கடன்களைப் பெறும்போது, அவற்றின் நிபந்தனைகளைத் தெளிவாக அறிந்துகொண்டு விழிப்புடன் செயல்படுமாறு இலங்கை காவல்துறை பொதுமக்களைக் கேட்டுக்கொண்டுள்ளது. 

சமூக வலைத்தள விளம்பரங்கள் மற்றும் செயலிகள் மூலம் கடன் பெற்றுக்கொண்ட வாடிக்கையாளர்களிடம், பணத்தைத் திரும்பச் செலுத்தும்போது கடுமையான கூடுதல் வட்டி வசூலிக்கப்பட்டு அவர்கள் நெருக்கடிகளுக்கு உள்ளாக்கப்படுவதாகத் தொடர்ந்து தகவல்கள் பதிவாகியுள்ளன.

இந்த விவகாரம் தொடர்பாக குற்றப்புலனாய்வுத் திணைக்களத்தின் நிதி குற்றப் புலனாய்வுப் பிரிவு விரிவான விசாரணைகளை முன்னெடுத்துள்ளது. கடன் கோருவோர் சம்பந்தப்பட்ட நிதி நிறுவனங்களின் விதிமுறைகளையும் நிபந்தனைகளையும் முழுமையாகப் புரிந்துகொள்ளாமல் அவசரப்பட்டு கடன் பெறுவதாலேயே இத்தகைய நிதி நெருக்கடிகளுக்கும் அசௌகரியங்களுக்கும் ஆளாகின்றனர் என்பது முதற்கட்ட விசாரணையில் தெரியவந்துள்ளது.

குறித்த கடன் செயலிகளைப் பயன்படுத்துவதால் ஏற்படும் அனைத்துப் பாதிப்புகள் மற்றும் நிதி அபாயங்களை வாடிக்கையாளரே முழுமையாக ஏற்க வேண்டும் என்பதுடன், கடன் தொகை திரும்பப் பெறப்படும் நடைமுறைகள் குறித்தும் அந்த நிறுவனங்களின் நிபந்தனைகளில் தெளிவாகக் குறிப்பிடப்பட்டுள்ளது. 

எனவே, நிகழ்நிலை கடன் பெற முனையும் பொதுமக்கள், கடன் ஒப்பந்தங்கள் மற்றும் நிபந்தனைகளை முழுமையாக வாசித்துத் தெளிவுபெற்ற பின்னரே முடிவெடுக்க வேண்டும் என்றும், இதன் மூலம் தேவையற்ற நிதி இழப்புகளிலிருந்தும் சிக்கல்களிலிருந்தும் தங்களைப் பாதுகாத்துக் கொள்ள முடியும் என்றும் காவல்துறை அறிவுறுத்தியுள்ளது.