சிலிக்கான் பள்ளத்தாக்கு பாலியல் சர்ச்சை: 100 விவிஐபிக்கள் அடங்கிய ரகசியப் பட்டியல் குறித்து பெண்கள் எச்சரிக்கை

அமெரிக்காவின் கலிஃபோர்னியா மாகாணம் சான் பிரான்சிஸ்கோ பகுதியில் அமைந்துள்ள சிலிக்கான் பள்ளத்தாக்கில், முன்னணி தொழில்நுட்ப நிறுவனங்களைச் சேர்ந்தவர்கள் மற்றும் முதலீட்டாளர்கள் மீது பாலியல் தொல்லை குற்றச்சாட்டுகள் எழுந்துள்ளன.

தொழில் வாழ்க்கையில் ஏற்படும் பாதிப்புக்கு அஞ்சி பாதிக்கப்பட்ட பெண்கள் காவல்துறையிடம் செல்லாமல், தங்களுக்குள் ஒரு ரகசிய தகவல் பரிமாற்றக் குழுவை உருவாக்கி சக பெண்களை எச்சரித்து வருகின்றனர்.

பாதிக்கப்பட்ட பெண்கள் தங்களுக்குள் தகவல்களைப் பகிர்ந்துகொள்ள "விஸ்பர் நெட்வொர்க்" என்ற ரகசிய அமைப்பை ஏற்படுத்தியுள்ளனர். இந்தக் குழுவில் டெக் துறை, செயற்கை நுண்ணறிவு துறை, தொழில் முதலீட்டாளர்கள் மற்றும் தொழிலதிபர்கள் உள்ளிட்ட 100-க்கும் மேற்பட்ட விவிஐபிக்களின் பெயர்கள் அடங்கிய பட்டியல் பராமரிக்கப்பட்டு வருகிறது.

இதில் பெண்களுக்கு மயக்க மருந்து கொடுத்து அத்துமீறியது, பாலியல் தொல்லை மற்றும் பாலியல் வன்கொடுமை உள்ளிட்ட பல்வேறு குற்றச்சாட்டுகள் இடம்பெற்றுள்ளதாகத் தெரிகிறது. இந்த விவகாரத்தில் குற்றம்சாட்டப்பட்ட நபர்கள் செல்வாக்கு மிக்கவர்களாக இருப்பதால், சட்டப்படி புகார் அளித்தால் தங்களின் வேலை மற்றும் எதிர்காலம் பாதிக்கப்படும் என்ற அச்சத்தில் பெரும்பாலான பெண்கள் வெளிப்படையாகப் புகார் அளிக்க முன்வரவில்லை.

தொழில்முனைவோர், முதலீட்டாளர்கள் மற்றும் இளைஞர்கள் இணைந்து தங்கும் வீடுகளில் இத்தகைய அத்துமீறல்கள் அதிகமாக நடப்பதாகப் புகார்கள் தெரிவிக்கின்றன. பகலில் வேலை செய்துவிட்டு, இரவில் பார்ட்டிகள் மற்றும் பொது நிகழ்வுகளில் ஒன்றாகப் பங்கேற்பதால் தனிப்பட்ட மற்றும் பணி ரீதியான எல்லைகள் மங்கிவிடுகின்றன.

இச்சூழலில் வெளிநாடுகளிலிருந்து புதிதாக வேலை தேடி வருபவர்களையும், தனிமையில் இருப்பவர்களையும் குறிவைத்து இத்தகைய செயல்கள் நடப்பதாகக் கூறப்படுகிறது. மேலும், சில இடங்களில் இச்சம்பவங்கள் குறித்து வெளியே பேசக் கூடாது என மிரட்டல்களும் விடுக்கப்படுகின்றன.

இத்தகைய சூழலில் பாதிக்கப்பட்டவர்களில் ஒருவரான 'Zette' நிறுவனத்தின் தலைவர் யெஹோங் ஜூ, சான் பிரான்சிஸ்கோவில் தான் தங்கியிருந்த வீட்டில் இருந்த நபர் ஒருவர் 2021 டிசம்பரில் தன்னை பாலியல் வன்கொடுமை செய்ததாகத் தெரிவித்தார். இச்சம்பவம் தொடர்பாக உடனடியாகக் காவல்துறையில் புகார் அளித்தும், போலீசார் நடவடிக்கை எடுக்கவோ குற்றம்சாட்டப்பட்டவரைக் கைது செய்யவோ இல்லை என்று அவர் கூறியுள்ளார்.

இதேபோல் 'Launch House' என்ற இடத்தில் நடந்த நிகழ்வு ஒன்றில் மயக்க மருந்து கொடுக்கப்பட்டு தவறாக நடத்தப்பட்ட மற்றொரு பெண்ணும், தன்னிடம் ஆதாரம் இல்லாததால் காவல்துறையிடம் செல்லவில்லை என்று குறிப்பிட்டுள்ளார்.

இந்த ரகசியப் பட்டியலில் இடம்பெற்றுள்ள நபர்கள் மீதான குற்றச்சாட்டுகள் சட்டப்பூர்வமாக நிரூபிக்கப்படவில்லை என்றாலும், பாதிக்கப்பட்ட பெண்கள் மற்றவர்களின் பாதுகாப்பிற்காக இந்த எச்சரிக்கைப் பட்டியலைத் தங்களுக்குள்ளேயே பகிர்ந்து வருகின்றனர்.