மும்பை இந்தியன்ஸ் வரலாற்று சாதனை... ரோகித் அதிரடி.. தொடர் தோல்விகளுக்கு முற்றுப்புள்ளி

வமும்பை இந்தியன்ஸ் அணி, IPL 2026 தொடரில் அதிரடியான வெற்றியை பதிவு செய்து வரலாற்று சாதனை படைத்துள்ளது. லக்னோ சூப்பர் ஜெயன்ட்ஸ் அணியை 6 விக்கெட் வித்தியாசத்தில் வீழ்த்திய மும்பை, 229 ரன்கள் என்ற பெரிய இலக்கை 18.4 ஓவர்களில் எட்டியதன் மூலம் தனது மிகப்பெரிய சேஸ் சாதனையை உருவாக்கியது. தொடர்ந்து ஏற்பட்டிருந்த மூன்று தோல்விகளுக்கும் இந்த வெற்றி முற்றுப்புள்ளி வைத்தது.

முன்னதாக முதலில் பேட்டிங் செய்த லக்னோ அணியில், நிக்கோலஸ் பூரன் அதிரடியாக விளையாடி 21 பந்துகளில் 63 ரன்கள் குவித்து சீசனின் முதல் அரைசதத்தை பதிவு செய்தார். அவருக்கு துணையாக மிட்செல் மார்ஷ் 44 ரன்கள் சேர்த்தார்.

கேப்டன் ரிஷப் பந்த் விரைவில் அவுடானாலும், ஏடன் மார்க்ரம் (31*) மற்றும் ஹிம்மத் சிங் (40*) இணைந்து அணியை 228/5 என்ற வலுவான ஸ்கோருக்கு கொண்டு சென்றனர்.

பின்னர் 229 ரன்கள் என்ற கடின இலக்குடன் களமிறங்கிய மும்பை அணிக்கு, காயத்திலிருந்து மீண்டு வந்த ரோஹித் ஷர்மா மற்றும் ரிகெல்டன் சிறப்பான தொடக்கம் தந்தனர். பவர்பிளேவில் 71 ரன்கள் குவித்த இந்த ஜோடி, பெரிய கூட்டணியை அமைத்து அணியின் வெற்றிக்கு வலுவான அடித்தளத்தை அமைத்தது.

ரோஹித் தனது இன்னிங்ஸில் 7 சிக்சர்கள் அடித்து ரசிகர்களை உற்சாகப்படுத்தினார்.

இருப்பினும், லக்னோ பந்துவீச்சாளர்கள் தொடர்ந்து விக்கெட்டுகளை எடுத்ததால் ஆட்டம் சற்று பதட்டமாக மாறியது. அந்த சூழ்நிலையில் சூர்யகுமார் யாதவ் அமைதியான இன்னிங்ஸை விளையாடி அணியை நிலைநிறுத்தினார்.

பின்னர் நமன் தீர் (22) மற்றும் வில் ஜாக்ஸ் அதிரடியாக விளையாடி வெற்றியை உறுதி செய்தனர். குறிப்பாக கடைசி கட்டத்தில் வில் ஜாக்ஸ் அடித்த சிக்சர் மும்பையின் வெற்றியை முடிவுக்குக் கொண்டுவந்தது.

இந்த வெற்றியின் மூலம் மும்பை இந்தியன்ஸ் தன்னம்பிக்கையை மீட்டுள்ளது. மறுபுறம், லக்னோ சூப்பர் ஜெயன்ட்ஸ் அணிக்கு இது ஆறாவது தொடர்ச்சியான தோல்வியாக அமைந்துள்ளது. புள்ளிப்பட்டியலில் கடைசி இடத்தில் உள்ள அவர்கள், பிளேஆஃப் வாய்ப்பை இழக்கும் அபாயத்தில் உள்ளனர்.