பெண்ணிடம் தகாத உறவு...விடுதி உரிமையாளருக்கு மயக்க மருந்து கொடுத்து நகை, பணம் கொள்ளை: இளைஞர் கைது

மிரிஸ்ஸ பகுதியில் சுற்றுலா விடுதி நடத்தி வரும் பெண்ணிடம் தகாத உறவு வைத்து, அவருக்கு மயக்க மருந்து கொடுத்து பெருமளவிலான நகை மற்றும் பணத்தைக் கொள்ளையடித்த 32 வயதுடைய நபர் ஒருவரை அனுராதபுர தலைமையகப் பொலிஸார் கைது செய்துள்ளனர்.

புஞ்சிகுளம் பகுதியைச் சேர்ந்த சந்தேகநபர் கடந்த செப்டம்பர் 30ஆம் திகதி கைது செய்யப்பட்டதாகப் பொலிஸார் தெரிவித்தனர்.

பாதிக்கப்பட்ட பெண்ணுடன் ஏற்பட்ட நெருக்கத்தைப் பயன்படுத்திய சந்தேகநபர், அனுராதபுரப் பகுதியில் காணி மற்றும் வீடு வாங்கித் தருவதாகக் கூறி அவரை நம்ப வைத்துள்ளார்.

இதனையடுத்து, கடந்த செப்டம்பர் 20ஆம் திகதி அப்பெண்ணைக் கவர்க்குளம் பகுதியிலுள்ள விடுதியொன்றுக்கு அழைத்துச் சென்றுள்ளார். அங்கு வைத்து அப்பெண்ணுக்கு போதைப்பொருள் கலந்த சூப் வழங்கப்பட்டுள்ளது.

அந்த சூப்பைக் குடித்ததும் பெண் மயக்கமடைந்துள்ளார். அந்தச் சந்தர்ப்பத்தைப் பயன்படுத்திய சந்தேகநபர், காணி வாங்குவதற்காக அப்பெண் தனது காரில் கொண்டு வந்திருந்த 30 இலட்சம் ரூபாய் பெறுமதியான தங்க நகைகள் மற்றும் 2 இலட்சத்து 25 ஆயிரம் ரூபாய் ரொக்கப் பணத்தைத் திருடிச் சென்றுள்ளார்.

இது குறித்து அளிக்கப்பட்ட முறைப்பாட்டின் பேரில் தீவிர விசாரணைகளை முன்னெடுத்த அனுராதபுர பொலிஸார், சந்தேகநபரைக் கைது செய்ததுடன் திருடப்பட்ட தங்க நகைகளின் ஒரு பகுதியையும் மீட்டுள்ளனர். கைது செய்யப்பட்ட நபர் அனுராதபுர நீதவான் நீதிமன்றத்தில் முன்னிலைப்படுத்தப்படவுள்ளார்.