கர்ப்பிணி பெண் உயிரோடு எரித்துக் கொலை: 4 பேர் கைது, இருவருக்கு வலைவீச்சு
மஹாராஷ்டிராவின் துலே மாவட்டத்தில் 31 வயது கர்ப்பிணி பெண்ணை காரில் 275 கி.மீ கடத்திச் சென்று உயிரோடு எரித்துக் கொன்ற சம்பவத்தில் 4 பேரை பொலிஸார் கைது செய்துள்ளனர்.
மஹாராஷ்டிரா மாநிலம் துலே மாவட்டத்தில் 31 வயதுடைய கர்ப்பிணி பெண் ஒருவர் உயிரோடு பெட்ரோல் ஊற்றி எரித்துக் கொல்லப்பட்ட கொடூர சம்பவத்தில் தொடர்புடைய நான்கு பேரை காவல்துறையினர் கைது செய்துள்ளனர்.
தலைமறைவாக உள்ள மேலும் இருவரைப் பிடிக்க தனிப்படைகள் அமைக்கப்பட்டு தீவிர தேடுதல் வேட்டை முன்னெடுக்கப்பட்டு வருகிறது.
துலே-சோலாப்பூர் நெடுஞ்சாலைக்கு அருகிலுள்ள கரதாத் பாரி பகுதியில் கர்ப்பிணி பெண்ணின் சடலம் எரிந்த நிலையில் கண்டெடுக்கப்பட்டதை அடுத்து இக்கொலைச் சம்பவம் வெளிச்சத்திற்கு வந்தது.
இதனையடுத்து வழக்குப் பதிவு செய்த காவல்துறையினர், சுமார் 11 மணி நேர சிசிடிவி காட்சிகளை தீவிர ஆய்வுக்கு உட்படுத்தினர். இந்தத் தொழில்நுட்ப பகுப்பாய்வின் மூலம் அஹில்யாநகர் மாவட்டம் ஜம்கேடு பகுதியில் உள்ள சப்தசுர் கலாச்சார கலை மையத்திற்கு சந்தேகத்திற்கிடமான வாகனம் ஒன்று சென்றது உறுதி செய்யப்பட்டது.
விசாரணையில், பீட் மாவட்டம் அருகே நிகழ்ந்த உள் தகராறில் பிங்கி ஹனுமந்த் என்ற 31 வயதுடைய கர்ப்பிணி பெண் கடுமையாகத் தாக்கப்பட்டுள்ளார் என்பது தெரியவந்தது.
தாக்குதலில் அவர் மயக்கமடைந்த நிலையில், அவர் உயிரிழந்துவிட்டதாகத் தவறாகக் கருதிய கும்பல் உடலை அப்புறப்படுத்தத் திட்டமிட்டுள்ளது.
அதனைத் தொடர்ந்து அவரை ஒரு காரில் சுமார் 275 கிலோமீட்டர் தூரம் ஏற்றிச் சென்று, துலே பகுதியில் உள்ள ஆள்நடமாட்டமற்ற மலைப்பகுதியில் வைத்து பெட்ரோல் ஊற்றி எரித்துள்ளனர்.
இக்கொலையில் தொடர்புடைய நான்கு பேர் கைது செய்யப்பட்டுள்ள நிலையில், தலைமறைவாகியுள்ள எஞ்சிய இரு சந்தேகநபர்களையும் காவல்துறையினர் தேடி வருகின்றனர்.
