வைபவ் சூர்யவன்ஷியை கிண்டல் செய்த சயீம் அயூப்! விளாசித் தள்ளிய கம்ரான் அக்மல்.. நடந்தது என்ன?

2026 ஆசிய விளையாட்டுப் போட்டிகளின் கிரிக்கெட் இறுதிப் போட்டியில், 15 வயது இந்திய இளம் வீரர் வைபவ் சூர்யவன்ஷியைக் களத்தில் வைத்து அற்பத்தனமாகக் கேலி செய்த பாகிஸ்தான் அணியின் சயீம் அயூப்பை, அந்நாட்டின் முன்னாள் விக்கெட் கீப்பர் கம்ரான் அக்மல் மிகக் கடுமையாகச் சாடியுள்ளார்.

இந்தியா மற்றும் பாகிஸ்தான் அணிகளுக்கு இடையே நடைபெற்ற இறுதிப் போட்டியில், இந்திய அணி அபாரமான ஆட்டத்தை வெளிப்படுத்தி தங்கப் பதக்கத்தைத் தட்டிச் சென்றது.

ஆட்டத்தின் 3-வது ஓவரில், 9 பந்துகளில் 15 ஓட்டங்களைப் பெற்றிருந்த இந்திய தொடக்க வீரர் வைபவ் சூர்யவன்ஷியின் விக்கெட்டை சயீம் அயூப் வீழ்த்தினார்.

அப்போது பெவிலியன் நோக்கித் திரும்பிய வைபவ்வின் சிறு வயதை ஏளனம் செய்யும் வகையில், குழந்தையைத் தொட்டிலில் வைத்து ஆட்டுவது போல் கைகளால் சைகை செய்து சயீம் அயூப் எல்லை மீறிய கொண்டாட்டத்தில் ஈடுபட்டார்.

எனினும், அவரது இந்த பரிகாசம் களத்தில் நீண்ட நேரம் நீடிக்கவில்லை. அதே ஓவரில் களமிறங்கிய அபிஷேக் சர்மா, அயூப்பின் பந்துவீச்சை நாலாபுறமும் சிதறடித்து அடுத்தடுத்து ஒரு சிக்ஸர், இரண்டு பவுண்டரிகளை விளாசித் தகுந்த பதிலடி கொடுத்தார்.

அத்துடன், ஆட்டத்தின் முக்கிய தருணங்களில் இரண்டு முக்கியமான பிடி வாய்ப்புகளையும் (Catches) சயீம் அயூப் தவறவிட்டார். இறுதியில் இந்திய அணி நிர்ணயித்த 212 ஓட்டங்கள் என்ற இமாலய இலக்கை எட்ட முடியாமல் பாகிஸ்தான் அணி படுதோல்வியைச் சந்தித்தது.

இவ்விவகாரம் தொடர்பாகத் தொலைக்காட்சி விவாதத்தில் பேசிய கம்ரான் அக்மல், சொந்த அணியின் சீரற்ற ஆட்டத்தை மறைத்து சமூக வலைத்தளங்களில் வைரலாவதற்காக மட்டுமே வீரர்கள் இத்தகைய தரம் தாழ்ந்த வேலைகளில் ஈடுபடுவதாகக் கொந்தளித்தார்.

எதிரணி வீரருக்கு 15 வயதாக இருந்தாலும் அவர் சர்வதேச அரங்கில் விளையாடுகிறார் என்ற அடிப்படை மரியாதையைத் தர வேண்டும் என்றும், சயீம் அயூப் ஒன்றும் குழந்தை அல்ல என்பதால் வீண் சேட்டைகளைக் கைவிட்டு சொந்த ஆட்டத்திறனில் கவனம் செலுத்த வேண்டும் என்றும் அக்மல் எச்சரித்துள்ளார்.