நல்லூரில் திலீபனின் சிலை பொலிஸாரால் அகற்றம்: தமிழரசுக் கட்சிக்கு தொடர்பில்லை என யாழ் மாநகர முதல்வர் விளக்கம்

யாழ்ப்பாணம் நல்லூரில் அமைக்கப்பட்டிருந்த தியாக தீபம் திலீபனின் திருவுருவச்சிலையை பொலிஸார் அகற்றியுள்ள நிலையில், இந்த விவகாரத்திற்கும் இலங்கை தமிழரசுக் கட்சிக்கும் எந்தவித தொடர்பும் இல்லை என யாழ் மாநகர முதல்வர் விவேகானந்தராஜா மதிவதனி தெரிவித்துள்ளார்.

ஐந்தம்சக் கோரிக்கைகளை முன்வைத்து நீராகாரமின்றி உண்ணாவிரதமிருந்து உயிர்நீத்த இராசையா பார்த்தீபன் எனப்படும் தியாக தீபம் திலீபனின் திருவுருவச்சிலை அமைந்திருந்த நல்லூர் பகுதிக்கு நேற்று காலை 6.30 மணியளவில் சுமார் 15 பொலிஸ் அதிகாரிகள் வருகை தந்தனர். அவர்கள் அங்கிருந்த சிலையை அகற்றி, தமது வாகனத்தில் ஏற்றிச் சென்றுள்ளனர்.

சிலை அகற்றப்பட்டமைக்கு இலங்கை தமிழரசுக் கட்சியும் உடந்தை எனத் தமிழ்த் தேசிய மக்கள் முன்னணியின் பொதுச் செயலாளர் செல்வராசா கஜேந்திரன் குற்றஞ்சாட்டியிருந்தார். இக்குற்றச்சாட்டுக்கு விளக்கம் அளிக்கும் வகையில் நடத்தப்பட்ட ஊடகவியலாளர் சந்திப்பிலேயே யாழ் மாநகர முதல்வர் மேற்கண்டவாறு குறிப்பிட்டார்.

யாழ் மாநகர சபை உறுப்பினர் ஒருவர் முன்வைத்த யோசனைக்கு அமைவாகவே, தற்காலிகமாக அந்தச் சிலையை வைப்பதற்கும் நினைவேந்தல் நிகழ்வை நடத்துவதற்கும் சபை ஏகமனதாகத் தீர்மானித்திருந்ததாக முதல்வர் சுட்டிக்காட்டினார்.

பொலிஸார் சிலையை அகற்றிய நடவடிக்கைக்கும் தமக்கும் எவ்வித தொடர்பும் இல்லை எனவும், சிலையை அகற்றும் நோக்கம் இலங்கை தமிழரசுக் கட்சிக்குக் கிடையாது எனவும் அவர் திட்டவட்டமாகத் தெரிவித்தார்.