நடுவானில் விமானிகளிடையே மோதல்: சவுதி அரேபியாவில் அவசரமாகத் தரையிறக்கப்பட்ட விமானம்

ஐக்கிய அரபு அமீரகத்தின் துபாயில் இருந்து இஸ்ரேல் நோக்கிச் சென்ற ஃப்ளைதுபாய் பயணிகள் விமானத்தில் இரண்டு விமானிகளுக்கு இடையே ஏற்பட்ட திடீர் மோதலைத் தொடர்ந்து, அந்த விமானம் சவுதி அரேபியாவில் அவசரமாகத் தரையிறக்கப்பட்டது.

துபாய் சர்வதேச விமான நிலையத்தில் இருந்து இஸ்ரேலின் பென் குரியன் விமான நிலையத்திற்கு சுமார் 180 இஸ்ரேலிய பயணிகளுடன் போயிங் 737 மேக்ஸ் 8 ரக விமானம் புறப்பட்டது.

நடுவானில் பறந்து கொண்டிருந்தபோது, காக்பிட் பகுதியில் இருந்த இரு விமானிகளுக்கு இடையே கடுமையான தகராறு ஏற்பட்டு கத்திக்குத்து வரை சென்றதாகத் தகவல்கள் தெரிவிக்கின்றன.

விமானம் புறப்பட்ட சிறிது நேரத்தில், கண்காணிப்பு அமைப்பில் பொதுவான அவசர நிலையைக் குறிக்கும் 7700 என்ற எண் பதிவானது. அடுத்த சில நிமிடங்களில், விமானக் கடத்தலைக் குறிக்கும் சர்வதேசக் குறியீடான 7500 ஆக அது மாற்றப்பட்டது.

ஹமாஸ் உடனான மோதல் சூழல் நிலவி வரும் வேளையில் இந்தக் குறியீடு பதிவானதால் இஸ்ரேல் உடனடியாக போர் விமானங்களை அனுப்பி நிலைமையைக் கண்காணித்தது. மோதலின் போது விமானிகள் தவறுதலாக இந்தக் கடத்தல் எச்சரிக்கைக் குறியீட்டைப் பதிவிட்டிருக்கலாம் என்று சந்தேகிக்கப்படுகிறது.

சுமார் 34,000 அடி உயரத்தில் பறந்துகொண்டிருந்த விமானம், இரண்டு நிமிடங்களில் சுமார் 16,600 அடி அளவுக்கு வேகமாகச் சரிந்து, ஏறத்தாழ 17,400 அடி உயரத்திற்கு வந்ததாகத் தரவுகள் தெரிவிக்கின்றன. காக்பிட் பகுதியில் இருந்து சத்தம் கேட்டதாகவும், பின்னர் கதவு திறக்கப்பட்டபோது உள்ளே ரத்தம் படிந்திருந்த நிலையில் ஒரு விமானி தாக்கப்பட்டுக் கிடந்ததாகவும் மிரியம் என்ற பெண் பயணி குறிப்பிட்டுள்ளார்.

மேலும், விமானிகளில் ஒருவர் தற்கொலை செய்து விமானத்தை விபத்துக்குள்ளாக்க முயன்றதாகக் கூறப்படும் தகவல் இதுவரை அதிகாரப்பூர்வமாக உறுதிப்படுத்தப்படவில்லை.

பயணிகள் மற்றும் விமானப் பணியாளர்கள் உடனடியாகத் தலையிட்டு விமானிகளுக்கு இடையேயான மோதலைத் தடுத்து நிறுத்தினர். இதனைத் தொடர்ந்து, சவுதி அரேபியாவின் தபுக் நகரில் உள்ள விமான நிலையத்தில் விமானம் பத்திரமாகத் தரையிறக்கப்பட்டது.

விமானத்தில் பயணித்த பயணிகள் அனைவரும் பாதுகாப்பாக இருப்பதாகவும், இஸ்ரேலிய மக்களைத் தாயகம் அழைத்து வரத் தேவையான நடவடிக்கைகள் எடுக்கப்பட்டு நிலைமை சீரடைந்துள்ளதாகவும் தெரிவிக்கப்பட்டுள்ளது.