பாசத்துக்குரிய பாரதிராஜா உயிரிழப்பு – மகன் போன வலியோடு இயக்குநர் இமயமும் போய்விட்டார்
இயக்குநர் இமயம் என்று அழைக்கப்பட்ட தமிழ் சினிமாவின் முன்னணி இயக்குநர் பாரதிராஜா (84) உடல்நலக் குறைவால் இன்று சென்னையில் காலமானார். கடந்த ஆண்டு அவரது மகன் மனோஜ் உயிரிழந்த துயரில் இருந்து மீளாத நிலையிலேயே உடல்நலமும் பாதிக்கப்பட்டிருந்தது.
இயக்குநர் இமயம் என்று ரசிகர்களால் கொண்டாடப்பட்ட பாரதிராஜா, வயோதிகம் காரணமாகவும், மகன் மனோஜின் உயிரிழப்பைத் தாங்க முடியாமலும் உடல்நலப் பாதிப்புக்கு ஆளானார்.
1977-ம் ஆண்டு ‘16 வயதினிலே’ திரைப்படத்தின் மூலம் இயக்குநராக அறிமுகமான பாரதிராஜா, அந்த முதல் படமே மெகா பிளாக்பஸ்டர் ஆகி, தமிழ் சினிமாவில் புதிய அலைகளை உருவாக்கியது.
‘கிழக்கே போகும் ரயில்’, ‘சிகப்பு ரோஜாக்கள்’, ‘மண்வாசனை’, ‘முதல் மரியாதை’, ‘வேதம் புதிது’, ‘கிழக்கு சீமையிலே’, ‘கருத்தம்மா’ என அவர் இயக்கிய பெரும்பாலான படங்கள் கிராமத்து மண்வாசனையை ரசிகர்களுக்குக் கடத்தின.
இதன் காரணமாக அவர் ‘இயக்குநர் இமயம்’ என்று கொண்டாடப்பட்டார். இயக்கத்தில் தனி முத்திரை பதித்த பாரதிராஜா, பின்னர் நடிப்பிலும் அசத்தினார். மேலும், ராதிகா, ராதா, ரேவதி உட்பட ஏராளமான நடிகர்கள், நடிகைகளைத் தமிழ் சினிமாவுக்கு அறிமுகப்படுத்திய பெருமையும் அவருக்கு உண்டு.
கடந்த ஆண்டு, அவரது மகனும் நடிகர்-இயக்குநருமான மனோஜ் உடல்நலக் குறைவால் உயிரிழந்தார். இந்தச் சோகம் பாரதிராஜாவை நிலைகுலையச் செய்தது; அவர் மனச்சோர்வும், உடல் நலக் குறைவும் அடைந்தார்.
இதன் காரணமாகச் சில காலம் தனியார் மருத்துவமனையில் தீவிர சிகிச்சை பெற்றார். பின்னர், உடல்நலம் சற்றுத் தேறியதும், சென்னை நீலாங்கரையில் உள்ள இல்லத்துக்கு அழைத்து வரப்பட்டார். அங்கு அவரது உடல்நிலை மருத்துவர்களால் உன்னிப்பாகக் கண்காணிக்கப்பட்டது.
எப்படியும் மீண்டுவிடுவார் என்று குடும்பத்தினரும், ரசிகர்களும் அதீத நம்பிக்கையில் இருந்த நிலையில், இன்று (ஜூன் 10) அதிகாலை திடீரென உடல்நிலை மோசமடைந்தது. அளிக்கப்பட்ட சிகிச்சை பலனின்றி, தனது 84-வது வயதில் உயிரிழந்தார்.
அவரது இறுதிச் சடங்குகள் நீலாங்கரை இல்லத்தில் நடைபெறும் என்று குடும்பத்தினர் தெரிவித்துள்ளனர். பாரதிராஜாவின் மறைவு ஒட்டுமொத்த தமிழ்நாட்டுக்கும் சோகத்தை ஏற்படுத்தியுள்ளது. திரையுலகப் பிரபலங்கள் அவரது இல்லத்துக்கு வரத் தொடங்கியுள்ளனர்.
