கொழும்பு மாளிகாவத்தையில் காதல் விவகாரத்தால் மோதல்: கத்திக்குத்தில் இரு இளைஞர்கள் உயிரிழப்பு, மூவர் காயம்
கொழும்பு மாளிகாவத்தை பகுதியில் காதல் தகராறு காரணமாக ஏற்பட்ட கத்திக்குத்து மோதலில் இரு இளைஞர்கள் உயிரிழந்ததுடன் மேலும் மூவர் காயமடைந்துள்ளனர்.
கொழும்பு மாளிகாவத்தை பகுதியில் காதல் விவகாரம் தொடர்பாக ஏற்பட்ட மோதலில் இரு இளைஞர்கள் கத்திக்குத்துக்கு இலக்காகி உயிரிழந்துள்ளனர் என்றும், மேலும் மூவர் காயமடைந்துள்ளனர் என்றும் பொலிஸார் தெரிவித்துள்ளனர்.
கடந்த 29 ஆம் திகதி இரவு இடம்பெற்ற இச்சம்பவத்தில், மாளிகாவத்தை பகுதியைச் சேர்ந்த 19 மற்றும் 20 வயதுடைய இளைஞர்களே உயிரிழந்துள்ளனர்.
யுவதியொருவரைக் காதலிப்பது தொடர்பாக ஏற்பட்ட முரண்பாடு முற்றிய நிலையில், குறித்த இரு இளைஞர்களும் கூர்மையான ஆயுதங்களால் ஒருவரையொருவர் கடுமையாகத் தாக்கிக்கொண்டனர்.
அப்போது மோதலைத் தடுத்து விலக்க முற்பட்ட ஏனைய இளைஞர்கள் சிலரும் கத்திக்குத்துக்கு இலக்காகினர்.
சம்பவத்தில் படுகாயமடைந்த இரண்டு இளைஞர்களும் உடனடியாக வைத்தியசாலையில் அனுமதிக்கப்பட்டுத் தீவிர சிகிச்சைப் பிரிவில் சிகிச்சை பெற்று வந்த நிலையில், சிகிச்சை பலனின்றி உயிரிழந்தனர்.
காயமடைந்த மற்றைய மூன்று இளைஞர்களும் தொடர்ந்து வைத்தியசாலையில் அனுமதிக்கப்பட்டுச் சிகிச்சை பெற்று வருகின்றனர். இச்சம்பவம் தொடர்பாக மாளிகாவத்தை பொலிஸார் மேலதிக விசாரணைகளை முன்னெடுத்து வருகின்றனர்.
