ஐரோப்பிய ஒன்றியத்துடன் இணைந்து செயற்படுவதால் உறவு மேலும் வலுவடையும்: பிரதமர் மார்க் கார்னி
ஐரோப்பிய ஒன்றியத்தின் இணை உறுப்பினராகக் கனடாவை இணைக்கும் முன்மொழிவை வரவேற்றுள்ள அந்நாட்டுப் பிரதமர் மார்க் கார்னி, இருதரப்பு உறவுகளை மேலும் வலுப்படுத்த விரும்புவதாகத் தெரிவித்துள்ளார்.
ஐரோப்பிய ஒன்றியத்துடன் கனடா இணைந்து செயல்படுவதன் மூலமே இரு தரப்பிற்கும் இடையிலான உறவு மேலும் வலுவடையும் என கனடா பிரதமர் மார்க் கார்னி தெரிவித்துள்ளார்.
ஐரோப்பிய ஒன்றியத்தில் கனடாவை ஓர் இணை உறுப்பினராக இணைத்துக் கொள்வது தொடர்பாக முன்வைக்கப்பட்ட திட்டத்தை அவர் வரவேற்றுள்ளார். பிரான்சின் ஸ்ட்ராஸ்பேர்க் நகரில் அமைந்துள்ள ஐரோப்பிய நாடாளுமன்றத்தில் உரையாற்றிய போதே அவர் இந்தக் கருத்துக்களை வெளியிட்டார்.
ஐரோப்பாவும் கனடாவும் தனித்தனியாக வலிமையானவை என்றாலும், ஒன்றிணையும் போது மேலும் ஆற்றல் மிக்கவையாக மாறும் என அவர் தனது உரையில் சுட்டிக்காட்டினார்.
கனடாவை இணை உறுப்பினராகச் சேர்ப்பதற்கான ஐரோப்பிய ஆணைக்குழுவின் தலைவர் உர்சுலா வொன் டேர் லேயனின் முன்மொழிவை அமெரிக்க ஜனாதிபதி டொனால்ட் ட்ரம்ப் கடுமையாக விமர்சித்துள்ளார்.
இந்த முன்னெடுப்பு அமெரிக்காவிற்கு எதிரான பகையான செயலாகக் கருதப்பட்டால், ஐரோப்பிய ஒன்றியத்தின் மீது மிகக் கடுமையான வரிகளை விதிக்க நேரிடும் அல்லது சில வர்த்தகங்களை நிறுத்த வேண்டி வரும் என அவர் எச்சரித்துள்ளார்.
எனினும், இந்த முன்மொழிவு எந்தவொரு நாட்டிற்கும் எதிரானது அல்ல என்றும், இரு தரப்பினரின் பொதுவான பலத்தை அதிகரிக்கும் நோக்கிலேயே கொண்டுவரப்பட்டது என்றும் ஐரோப்பிய ஆணைக்குழு விளக்கம் அளித்துள்ளது.
முக்கிய கனிம வளங்கள், பாதுகாப்புத் துறை, செயற்கை நுண்ணறிவு, ஆற்றல் பாதுகாப்பு மற்றும் விண்வெளி ஆராய்ச்சி உள்ளிட்ட பல முக்கிய துறைகளில் ஐரோப்பிய ஒன்றியத்துடன் இணைந்து மிக நெருக்கமாகப் பணியாற்றக் கனடா எதிர்பார்ப்பதாக பிரதமர் மார்க் கார்னி தனது உரையில் மேலும் உறுதிப்படுத்தியுள்ளார்.
