தொண்டையில் கல் சிக்கியதில் 10 நாள்களேயான பச்சிளம் பெண் குழந்தை உயிரிழப்பு: தாய் வைத்தியசாலையில் அனுமதி
பதுளையில் பிறந்து 10 நாள்களேயான பெண் குழந்தை தொண்டையில் கல் சிக்கி பதுளை பொது வைத்தியசாலையில் உயிரிழந்த நிலையில், மனநலம் பாதிக்கப்பட்ட தாயாரும் வைத்தியசாலையில் அனுமதிக்கப்பட்டுள்ளார்.
பதுளையில் பிறந்து பத்து நாள்களேயான பச்சிளம் பெண் குழந்தையொன்று தொண்டையில் கல் சிக்கி மூச்சுத்திணறியதால், பதுளை பொது வைத்தியசாலையில் சிகிச்சை பலனின்றி உயிரிழந்துள்ளது.
தாயார் குழந்தையைக் குளிப்பாட்டிவிட்டுத் தூங்க வைக்க முற்பட்ட சந்தர்ப்பத்திலேயே இச்சம்பவம் நிகழ்ந்துள்ளதாக பொலிஸாரின் ஆரம்பகட்ட விசாரணைகளில் தெரியவந்துள்ளது.
குழந்தையின் தொண்டைப் பகுதியிலிருந்து இரத்தம் வடிந்ததையடுத்து, உடனடியாக வெலிமட ஆதார வைத்தியசாலையில் அனுமதிக்கப்பட்டு, பின்னர் மேலதிக சிகிச்சைக்காகப் பதுளை பொது வைத்தியசாலைக்கு மாற்றப்பட்டது.
அங்கு வைத்தியர்களால் முன்னெடுக்கப்பட்ட அவசர அறுவை சிகிச்சையின் மூலம் தொண்டையில் சிக்கியிருந்த கல் வெற்றிகரமாக அகற்றப்பட்ட போதிலும், சிகிச்சை பலனின்றி குழந்தை உயிரிழந்தது.
இதனிடையே, மனநலப் பாதிப்புக்குள்ளாகியிருந்த அக்குழந்தையின் தாயாரும் சிகிச்சைக்காக வைத்தியசாலையில் அனுமதிக்கப்பட்டுள்ளார்.
இச்சம்பவம் தொடர்பில் நீதிமன்றத்திற்குத் தகவல் வழங்கப்பட்டதை அடுத்து, நீதிபதியின் உத்தரவின் பேரில் அவசரப் பிரேதப் பரிசோதனை முன்னெடுக்கப்பட்டு வருவதாகப் பொலிஸார் தெரிவித்துள்ளனர்.
