அமெரிக்கா செல்கிறார் ஜி ஜின்பிங்: நேரில் வரவேற்கிறார் டிரம்ப்
சீன அதிபர் ஜி ஜின்பிங் செப்டம்பர் 23 அன்று அமெரிக்கா செல்கிறார். ஆண்ட்ரூஸ் தளத்தில் டிரம்ப் நேரில் வரவேற்கும் நிலையில், வரி மற்றும் வர்த்தகம் தொடர்பாக வெள்ளை மாளிகையில் முக்கியப் பேச்சுவார்த்தை நடைபெறுகிறது.
சீன அதிபர் ஜி ஜின்பிங் அரசு முறைப் பயணமாக செப்டம்பர் 23-ஆம் தேதி அமெரிக்கா செல்கிறார். வாஷிங்டன் அருகே உள்ள ஆண்ட்ரூஸ் விமானப்படைத் தளத்தை அவர் சென்றடையும் போது, மரபுகளைக் கடந்து அதிபர் டொனால்ட் டிரம்ப் நேரில் சென்று அவரை வரவேற்க உள்ளதாக வெள்ளை மாளிகை வட்டாரங்கள் தெரிவித்துள்ளன.
இதனைத் தொடர்ந்து, வெள்ளை மாளிகையில் செப்டம்பர் 24 அன்று இரு நாட்டுத் தலைவர்களுக்கும் இடையிலான விரிவான இருதரப்பு பேச்சுவார்த்தை நடைபெறுகிறது. உலக அளவில் பெரும் எதிர்பார்ப்பை ஏற்படுத்தியுள்ள இச்சந்திப்பில் வரிகள், செயற்கை நுண்ணறிவு தொழில்நுட்பக் கட்டுப்பாடு, அரிய கனிமங்கள் மற்றும் வர்த்தக உறவுகள் குறித்து முக்கியமாக விவாதிக்கப்பட உள்ளது.
இந்த சந்திப்பு குறித்துப் பேசிய அதிபர் டிரம்ப், தானும் சீன அதிபரும் மிகச் சிறந்த நல்லுறவைக் கொண்டுள்ளதாகக் குறிப்பிட்டார். இந்தச் சந்திப்பின் மூலம் இரு நாடுகளுக்கும் இடையே பல முக்கிய ஒப்பந்தங்கள் கையெழுத்தாக உள்ளதாகத் தெரிவித்த அவர், சீனா அமெரிக்காவிற்கு அதிக சுங்க வரிகளைச் செலுத்தி வருவதாகவும், முன்பு தான் 145 சதவீதம் வரை உயர்த்திய வரி அந்நாட்டுப் பொருளாதாரத்தைக் கடுமையாகப் பாதித்ததால் அதைத் தொடர்ந்து நீட்டிக்க விரும்பவில்லை என்றும் கூறியுள்ளார்.
