அமெரிக்காவில் விமான சேவைகள் பாதிப்பு: முக்கிய சர்வதேச விமான நிலையங்களில் பயணிகள் அவதி

அமெரிக்காவின் நியூஜேர்சி பகுதியில் முன்னெடுக்கப்பட்ட நிர்மாணப் பணிகளின் போது பிரதான கண்ணாடி இழை வட இணைப்பு (Fiber-optic cable) துண்டிக்கப்பட்டதைத் தொடர்ந்து, அந்நாட்டின் வடகிழக்கு பிராந்தியத்தில் உள்ள முக்கிய சர்வதேச விமான நிலையங்களில் நூற்றுக்கணக்கான விமான சேவைகள் இடைநிறுத்தப்பட்டதுடன் பாரிய தாமதங்களையும் எதிர்கொண்டுள்ளன. 

விமானங்களின் புறப்பாடு மற்றும் தரையிறங்குதலை வழிநடத்தும் ரேடார் சமிக்ஞை மற்றும் தொடர்பாடல் கட்டமைப்பில் ஏற்பட்ட பாதிப்பு காரணமாகவே இந்த அவசரத் தடை உத்தரவு பிறப்பிக்கப்பட்டதாக அமெரிக்க பெடரல் விமான போக்குவரத்து நிர்வாகம் (FAA) தெரிவித்துள்ளது.

நியூயோர்க் நகரிற்கு சேவை வழங்கும் நியூவர்க் லிபர்ட்டி சர்வதேச விமான நிலையம், ஜோன் எப். கென்னடி சர்வதேச விமான நிலையம், லாகார்டியா விமான நிலையம் மற்றும் பிலடெல்பியா சர்வதேச விமான நிலையம் உள்ளிட்ட பல விமான நிலையங்களின் சேவைகள் இந்த தொழில்நுட்ப கோளாறினால் வெகுவாகப் பாதிக்கப்பட்டுள்ளன. 

குறிப்பாக நியூவர்க் விமான நிலையத்தில் இருந்து புறப்படவிருந்த 267 விமானங்களும், அங்கு வந்தடையவிருந்த 257 விமானங்களும் காலதாமதத்திற்கு உள்ளாகியுள்ளதாக விமான கண்காணிப்புத் தரவுகள் தெரிவிக்கின்றன. சில விமானங்கள் மாற்று விமான நிலையங்களுக்கு திருப்பி விடப்பட்டதால் பல்லாயிரக்கணக்கான பயணிகள் கடுமையான அசௌகரியங்களுக்கு உள்ளாகினர்.

அம்திராக் (Amtrak) தொடருந்து சேவைக்குரிய நிர்மாணப் பணியாளர்கள் நிலத்தடி அகழ்வுப் பணிகளில் ஈடுபட்டிருந்த வேளையிலேயே குறித்த வட இணைப்பு தவறுதலாக சேதமடைந்துள்ளதாக அமெரிக்க போக்குவரத்து செயலாளர் ஷான் டஃபி தெரிவித்துள்ளார். 

பழைய உட்கட்டமைப்பு வசதிகளை உடனடியாக நவீனமயப்படுத்த வேண்டியதன் அவசியத்தை இந்த சம்பவம் உணர்த்துவதாகவும், நிலைமையை சீர்செய்வதற்கான நடவடிக்கைகள் துரிதமாக முன்னெடுக்கப்பட்டு வருவதாகவும் அவர் குறிப்பிட்டுள்ளார்.

பிரதான தொலைத்தொடர்பு மின்சுற்று செயலிழந்த போது, அதற்கு மாற்றீடாக இயங்க வேண்டிய இந்த அவசரகால மாற்று வட இணைப்பு ஏற்கனவே சேதமடைந்திருந்தமை தெரியவந்ததாக விமான போக்குவரத்து நிர்வாகத்தின் தலைவர் பிரையன் பெட்போர்ட் சுட்டிக்காட்டியுள்ளார். 

சேதமடைந்த சுமார் 600 அடி நீளமுள்ள வட இணைப்பை முழுமையாகப் புனரமைக்க சுமார் 13 மணித்தியாலங்கள் வரை செல்லலாம் என மதிப்பிடப்பட்டுள்ள நிலையில், சில விமான நிலையங்களில் மட்டுப்படுத்தப்பட்ட அளவில் சேவைகள் மீண்டும் ஆரம்பிக்கப்பட்டுள்ளன.