ஐநா பொதுச்சபையில் நெதன்யாகு உரையின்போது வெளிநடப்பு செய்த வெளிநாட்டுப் பிரதிநிதிகள்: ஆவேச விமர்சனம்

அமெரிக்காவின் நியூயார்க் நகரில் நடைபெற்று வரும் ஐக்கிய நாடுகள் அவையின் 81-வது பொதுச்சபைக் கூட்டத்தில் இஸ்ரேல் பிரதமர் பெஞ்சமின் நெதன்யாகு உரையாற்றினார்.

சீன அதிபர் ஜி ஜின்பிங் உள்ளிட்ட உலக நாடுகளின் தலைவர்கள் பங்கேற்றுள்ள இம்மாநாட்டில், இஸ்ரேல் மேற்குக் கரையை ஆக்கிரமித்துள்ளதாகக் கூறி நெதன்யாகுவின் உரைக்கு முன்பே கடும் எதிர்ப்பு உருவானது.

நெதன்யாகு மேடையேறிப் பேசத் தொடங்கியதும் 12-க்கும் மேற்பட்ட நாடுகளின் பிரதிநிதிகள் பொதுச்சபை அரங்கிலிருந்து வெளிநடப்பு செய்தனர். அதேநேரம், அவையிலிருந்த மற்றொரு தரப்பினர் நெதன்யாகுவுக்கு ஆதரவாகக் கைதட்டி 'இஸ்ரேல் வாழ்க' என முழக்கங்களை எழுப்பினர்.

பிரதிநிதிகளின் இந்த வெளிநடப்பைக் கண்டு ஆவேசமடைந்த நெதன்யாகு, அரங்கிலிருந்து இன்னும் வெளியேறாமல் தார்மீகக் கோழைகள் யாரேனும் இருந்தால் அவர்களும் தயவுசெய்து இப்போதே வெளியேறிவிடலாம் என விமர்சித்தார்.

மேலும் தொடர்ந்து உரையாற்றிய அவர், இப்போது வெளிநடப்பு செய்த சில நாடுகளின் பிரதிநிதிகள், ஈரான் மீது இஸ்ரேல் மேற்கொண்ட ராணுவ நடவடிக்கைக்காகத் தன்னைத் தனிப்பட்ட முறையில் தொடர்புகொண்டு நன்றி தெரிவித்ததாகக் குறிப்பிட்டார்.

இத்தகைய இரட்டை நிலைப்பாடு அதிர்ச்சியளிப்பதாகவும், ஈரான் அணு ஆயுதத் தளங்களை அழிக்கும் கடினமான முடிவை எடுக்காமல் போயிருந்தால் அனைவரும் உயிரிழந்திருக்க நேரிட்டிருக்கும் என்றும் அவர் திட்டவட்டமாகத் தெரிவித்தார்.