29 ஓவரில் முடிந்த ஆட்டம்.. வரலாற்று வெற்றி.. கொல்கத்தாவை கதறவிட்ட மும்பை இந்தியன்ஸ்!

2025 ஐபிஎல் தொடரில் மும்பை இந்தியன்ஸ் மற்றும் கொல்கத்தா நைட் ரைடர்ஸ் அணிகள் மோதிய எதிர்பார்ப்பு மிக்க போட்டியில் முதலில் பேட்டிங் செய்த கொல்கத்தா நைட் ரைடர்ஸ் அணியை வேகப்பந்துவீச்சால் மும்பை இந்தியன்ஸ் சின்னாபின்னம் ஆக்கியது.

முதலில் ட்ரெண்ட் போல்ட் தான் வீசிய முதல் ஓவரிலேயே ஒரு விக்கெட் வீழ்த்த, தீபக் சஹார் இரண்டு விக்கெட்டுகளை வீழ்த்தினார்.  அஸ்வனி குமார் மூன்று ஓவர்களில் 24 ரன்கள் விட்டுக் கொடுத்து நான்கு விக்கெட்டுகளை சாய்த்தார். 

ஹர்திக் பாண்டியா, விக்னேஷ் புத்தூர் மற்றும் மிட்செல் சாண்ட்னர் ஆகியோர் தலா ஒரு விக்கெட்டை வீழ்த்தினர். கொல்கத்தா நைட் ரைடர்ஸ் அணி 16.2 ஓவர்களில் அனைத்து விக்கெட்டுகளையும் இழந்து 116 ரன்கள் மட்டுமே எடுத்தது. 

அதிகபட்சமாக அங்குரிஷ் ரகுவன்ஷி 16 பந்துகளில் 26 ரன்கள் எடுத்திருந்தார். அவருக்கு அடுத்து ரமன்தீப் சிங் 12 பந்துகளில் 22 ரன்களை சேர்த்திருந்தார். அடுத்து 117 ரன்கள் என்ற இலக்கை நோக்கி மும்பை இந்தியன்ஸ் அணி விளையாடியது. 

ரோஹித் சர்மா 13 ரன்களிலும், வில் ஜாக்ஸ் 16 ரன்களிலும் ஆட்டமிழந்தனர். ரயன் ரிக்கெல்டன் அதிரடியாக விளையாடி 41 பந்துகளில் 62 ரன்கள் சேர்த்தார். சூர்யகுமார் யாதவ் 9 பந்துகளில் 27 ரன்கள் சேர்த்திருந்தார். 

12.5 ஓவர்களில் எல்லாம் மும்பை இந்தியன்ஸ் அணி வெற்றி இலக்கை எட்டியது. மொத்தமாக 29.1 ஓவர்களில் ஒட்டுமொத்த போட்டியுமே முடிவுக்கு வந்தது.  இந்த வெற்றியின் மூலம் வான்கடே மைதானத்தில் ஒரே அணிக்கு எதிராக அதிக வெற்றிகளைப் பெற்று மும்பை இந்தியன்ஸ் அணி சாதனை படைத்திருக்கிறது.

அத்துடன், ஐபிஎல் வரலாற்றில் ஒரு மைதானத்தில் ஒரே எதிரணியை அதிக முறை வீழ்த்திய வரலாற்று சாதனையையும் செய்து இருக்கிறது மும்பை இந்தியன்ஸ். 

மும்பை வான்கடே மைதானத்தில் கொல்கத்தா நைட் ரைடர்ஸ் அணியை 10 முறை வீழ்த்தி உள்ள மும்பை இந்தியன்ஸ், கொல்கத்தா நைட் ரைடர்ஸ் அணிக்கு எதிராக 24 வெற்றிகளை பெற்று ஒரே அணிக்கு எதிராக அதிக வெற்றிகளை பெற்ற அணி என்ற சாதனையையும் படைத்துள்ளது.