துபாயில் வினோதம்: பிரபல மனித ரோபோவுக்கு திருமணம்? உண்மை என்ன தெரியுமா?

நவீன காலத்தில் மனிதர்களின் திருமணங்களே பல்வேறு சவால்களை எதிர்கொள்ளும் வேளையில், துபாயில் செயற்கை நுண்ணறிவு (AI) தொழில்நுட்ப ரோபோ ஒன்று திருமணம் செய்து கொண்டுள்ள செய்தி சமூக ஊடகங்களில் பரபரப்பை ஏற்படுத்தியுள்ளது. 

அதிலும், பிரபலமான 'பு சுனைதா' (Bu Zunaidah) என்ற மனித வடிவ ரோபோ, தான் மிக அழகான 'மோசா' (Mosa) என்ற ரோபோவை கரம்பிடித்ததாக இன்ஸ்டாகிராமில் பதிவிட்டுள்ளது. இந்த பதிவு தற்போது இணையத்தில் வேகமாகப் பரவி வைரலாகி வருகிறது.

இந்த நிகழ்வின் பின்னணியில், கடந்த 2025-ம் ஆண்டு ஆகஸ்ட் மாதம் துபாயில் உள்ள எமிரேட்ஸ் டவர்ஸ் அருகே மனிதர்கள் நடப்பது போல ஒரு ரோபோ சாலையில் வேகமாக கடந்து சென்ற காட்சிகள் அப்போதே அனைவரின் கவனத்தையும் ஈர்த்தது. 

அந்த ரோபோதான் தற்போது 'பு சுனைதா' என்ற பெயரில் அறியப்படுகிறது. அமீரகத்தில் மட்டுமல்லாமல் உலகம் முழுவதும் டிரெண்டிங் செய்தியாக மாறிய இந்த ரோபோ, அமீரக தலைவர்களின் கவனத்தையும் ஈர்த்தது. அமீரக துணை அதிபர் மேதகு ஷேக் முகம்மது பின் ராஷித் அல் மக்தூம் அவர்களே நேரில் அழைத்து இந்த ரோபோவின் செயல்பாடுகளை பார்வையிட்டுள்ளார் என்பது குறிப்பிடத்தக்கது.

துபாய் எதிர்கால ஆய்வகத்தில் (Dubai Future Foundation) உருவாக்கப்பட்ட 'ஜி-1' (G-1) என்ற மனித வடிவ ஹுமனாய்டு வகை ரோபோவான இதனை, எதிர்கால ஆய்வகத்தின் மூத்த ரோபோட்டிக்ஸ் பொறியாளர்களான டாக்டர் அகமது அல் அத்தார் மற்றும் மைதா அல் கைத்தி ஆகியோர் உருவாக்கி இயக்கி வருகின்றனர். 

இந்த ரோபோ சீராக நடந்து, ஓடி, ஒவ்வொரு அசைவிலும் மனிதர்களை பிரதிபலிப்பதால் அனைவரையும் வியப்பில் ஆழ்த்துகிறது. மனித வடிவில் மனிதர்களின் செயல்பாடுகளை செய்யும் வகையில் உருவாக்கப்படும் இவை 'ஹுமனாய்டு ரோபோக்கள்' என அழைக்கப்படுகின்றன.

இந்த வகையில் உருவாக்கப்பட்ட திறன் வாய்ந்த பு சுனைதா ரோபோ ஏற்கனவே கடந்த பக்ரீத் பண்டிகையின் போது பெரும் சர்ச்சையை ஏற்படுத்தியது என்பது குறிப்பிடத்தக்கது. அமீரக பாரம்பரிய உடையான கந்தூரா அணிந்து, பள்ளிவாசலுக்குள் சென்று தொழுகையில் கலந்து கொண்ட அந்த காட்சிகள் சமூக ஊடகங்களில் வீடியோவாக பதிவிடப்பட்டன. வழிபாட்டு செயலில் ஒரு எந்திரம் எவ்வாறு பங்கேற்க முடியும்? என பலரும் கேள்வி எழுப்பி, இது குறித்து வருத்தத்தைப் பதிவு செய்தனர்.

இந்நிலையில், தற்போது அடுத்தகட்டமாக பு சுனைதா ரோபோவுக்கு நடந்ததாக கூறப்படும் திருமண நிகழ்வு மீண்டும் சமூக ஊடகங்களை அதிரவைத்துள்ளது. கடந்த 1-ம் தேதி நடந்ததாக கூறப்படும் இந்த நிகழ்வில், கருப்பு நிற அபாயா அணிந்த 'மோசா' என்ற பெண் வடிவ ரோபோவுடன், பாரம்பரிய  உடையணிந்த பு சுனைதா இணைந்த புகைப்படங்களும் வீடியோக்களும் அதிகமாக பகிரப்பட்டு வருகின்றன. 

'இறைவனுக்கு நன்றி, இன்று நான் மிகவும் அழகான மோசா ரோபோவை திருமணம் செய்து கொண்டேன்' என்று பு சுனைதா ரோபோ தனது பக்கத்தில் பதிவிட்டுள்ளது. இருப்பினும், இதன் உண்மை பின்னணி இது சட்டப்பூர்வமான அல்லது மத ரீதியிலான திருமணம் அல்ல என்பதை தெளிவுபடுத்துகிறது. 

இதனை இயக்கும் நிறுவனம் சமூக ஊடகங்களில் கவனத்தை ஈர்க்கும் வகையில் உருவாக்கிய ஒரு சுவாரசியமான விளம்பர நடவடிக்கை என்று கூறப்பட்டுள்ளது. இருந்தாலும், அமீரகத்தின் பண்பாடு மற்றும் முக்கிய நிகழ்வுகளை விளம்பரப்படுத்த இந்த ரோபோ தற்போது பயன்படுத்தப்பட்டு வருகிறது. 

இந்த பதிவுகளை கண்ட பல ஜென்-சி தலைமுறையினர், "மனிதர்களுக்கே திருமணம் ஆகாமல் இருக்கும் இந்த நிலையில், ரோபோவுக்கெல்லாம் பெண் கிடைக்கிறதே!" என்று நகைச்சுவையாகவும், ஏக்கத்துடனும் பதில்களை பதிவிட்டு வருகின்றனர்.