வங்காள விரிகுடாவில் தாழமுக்கம்: இலங்கையின் பல பகுதிகளில் கனமழை தொடரும்
வங்காள விரிகுடாவில் நிலவும் தாழமுக்கம் காரணமாக இலங்கையின் தென்மேற்கு உள்ளிட்ட பல பகுதிகளில் கனமழை மற்றும் பலத்த காற்று வீசக்கூடும் என வளிமண்டலவியல் திணைக்களம் எச்சரித்துள்ளது.
இலங்கைக்கு வடகிழக்கே வங்காள விரிகுடா கடற்பரப்பில் நிலவிய குறைந்த காற்றழுத்த தாழ்வுப் பகுதி தற்போது தாழமுக்கமாக வலுவடைந்து நகர்ந்து வருவதாக வளிமண்டலவியல் திணைக்களம் தெரிவித்துள்ளது.
இந்தத் தொகுதி அடுத்த 24 மணித்தியாலங்களில் மேலும் வலுவடைந்து தீவிர தாழமுக்கமாக மாறக்கூடும் எனவும் கணிக்கப்பட்டுள்ளது.
இந்தத் தாழமுக்கத்தினால் இலங்கைக்கு நேரடித் தாக்கம் எதுவும் ஏற்படப் போவதில்லை என்றாலும், அத்தொகுதியை நோக்கி வீசும் காற்றோட்டம் காரணமாக நாட்டின் தென்மேற்குப் பகுதியில் நிலவும் மழை நிலைமை மேலும் நீடிக்கும் என்று திணைக்களம் இன்று அதிகாலை வௌியிட்டுள்ள அறிக்கையில் சுட்டிக்காட்டியுள்ளது.
இதன்படி மேல், சப்ரகமுவ, மத்திய மற்றும் வடமேல் மாகாணங்களிலும், காலி மற்றும் மாத்தறை மாவட்டங்களிலும் அவ்வப்போது மழை அல்லது இடியுடன் கூடிய மழை பெய்யக்கூடும். சில இடங்களில் 100 மில்லிமீற்றர் வரையான பலத்த மழை பதிவாகலாம்.
அத்துடன் வடமத்திய மாகாணத்திலும் மன்னார் மாவட்டத்திலும் இடைக்கிடையே மழை பெய்யும் வாய்ப்புள்ளது. ஊவா மாகாணத்திலும் மட்டக்களப்பு மற்றும் அம்பாறை மாவட்டங்களிலும் பிற்பகல் 2.00 மணிக்குப் பின்னர் ஆங்காங்கே மழை அல்லது இடியுடன் கூடிய மழை பெய்யக்கூடும்.
மத்திய மலைநாட்டின் மேற்கு சரிவுகளிலும் வடமத்திய, வடமேல் மாகாணங்களிலும் திருகோணமலை, ஹம்பாந்தோட்டை, மாத்தளை மாவட்டங்களிலும் அவ்வப்போது மணித்தியாலத்துக்கு 40 முதல் 50 கிலோமீற்றர் வேகத்தில் பலத்த காற்று வீசக்கூடும்.
இடியுடன் கூடிய மழை பெய்யும் சந்தர்ப்பங்களில் தற்காலிக பலத்த காற்று மற்றும் மின்னல் தாக்கங்களினால் ஏற்படும் பாதிப்புகளைக் குறைத்துக்கொள்ளத் தேவையான முன்னெச்சரிக்கை நடவடிக்கைகளை எடுக்குமாறு பொதுமக்கள் கேட்டுக்கொள்ளப்பட்டுள்ளனர்.
