ஒலியை விட 5 மடங்கு வேகத்தில் பாயும் புதிய ஹைப்பர்சோனிக் ஏவுகணை: வடகொரியா வெற்றிகர சோதனை
ஒலியை விட 5 மடங்கு வேகத்தில் பாயும் 'ஹவாசாங்-11 மா' ஹைப்பர்சோனிக் ஏவுகணையை வடகொரியா வெற்றிகரமாகச் சோதித்துள்ளதாகத் தெரிவிக்கப்பட்டுள்ளது.
அமெரிக்கா மற்றும் தென்கொரியாவின் கடுமையான பொருளாதாரத் தடைகளுக்கு மத்தியிலும், வடகொரியா புதிய அதிநவீன ஏவுகணை சோதனையை வெற்றிகரமாக நடத்தியுள்ளது.
அமெரிக்க அதிபர் டிரம்ப் பேச்சுவார்த்தைக்கு அழைப்பு விடுத்திருந்த நிலையிலும், தனது நிலைப்பாட்டை மாற்றிக்கொள்ளாத வடகொரியா ஒலியின் வேகத்தை விட 5 மடங்கு வேகமாகச் சென்று இலக்கைத் தாக்கும் 'ஹவாசாங்-11 மா' என்ற புதிய ஹைப்பர்சோனிக் ஏவுகணையைச் சோதித்துள்ளது.
வடகொரிய அதிபர் கிம் ஜாங் அன் தனது மகளுடன் நேரில் சென்று இந்த ஏவுகணை சோதனையைப் பார்வையிட்டார். இந்த வியூக நடவடிக்கை எதிரி நாடுகளுக்குக் குணப்படுத்த முடியாத தீராத தலைவலியை ஏற்படுத்தும் என்று அவர் எச்சரித்துள்ளார்.
கிழக்குக் கடற்கரைப் பகுதியிலிருந்து ஏவப்பட்ட இந்த ஏவுகணைகள் கடலில் சுமார் 600 கிலோமீட்டர் தூரம் பாய்ந்து விழுந்ததாகத் தென்கொரிய ராணுவம் உறுதிப்படுத்தியுள்ளது.
