ஈஸ்டர் தாக்குதல் வழக்கு: குற்றவாளிகளான 15 பேருக்கும் நீண்டகால கடூழிய சிறைத்தண்டனை; 9 பேர் விடுதலை

2019ஆம் ஆண்டு இடம்பெற்ற உயிர்த்த ஞாயிறு பயங்கரவாதத் தாக்குதல்களுக்கு சதித்திட்டம் தீட்டியமை, அதற்கு உடந்தையாக இருந்தமை மற்றும் தீவிரவாதப் பிரசார உரைகளை நிகழ்த்தியமை உள்ளிட்ட குற்றச்சாட்டுகளுக்கு குற்றவாளிகளாக அறிவிக்கப்பட்ட 15 பேருக்குமான தண்டனை விவரங்களை கொழும்பு நிரந்தர மூவரடங்கிய மேல் நீதிமன்ற நீதிபதிகள் குழாம் அறிவித்துள்ளது.

நவரத்ன மாரசிங்க, ராமநாதன் கண்ணன் மற்றும் சுஜீவ நிஸ்சங்க ஆகிய மூவர் அடங்கிய நீதிபதிகள் குழாத்தினால் இந்த வரலாற்றுச் சிறப்புமிக்க வழக்கின் தீர்ப்பு வழங்கப்பட்டுள்ளது.

அறிவிக்கப்பட்ட தண்டனை விவரங்களின்படி, குற்றவாளிகளாகக் காணப்பட்ட 15 பேரில் 5 பேருக்கு தலா 200 ஆண்டுகளும், மேலும் 5 பேருக்கு தலா 220 ஆண்டுகளும், 4 பேருக்கு தலா 240 ஆண்டுகளும், ஒருவருக்கு 260 ஆண்டுகளும் கடூழிய சிறைத்தண்டனை விதிக்கப்பட்டுள்ளது.

அத்துடன் தண்டனை விதிக்கப்பட்டவர்களுக்குச் சொந்தமான அசையும் மற்றும் அசையாச் சொத்துக்களை அரசுடைமையாக்குமாறும் நீதிமன்றம் உத்தரவிட்டுள்ளது. அதேவேளை, வழக்கில் போதிய சாட்சியங்கள் சமர்ப்பிக்கப்படாத காரணத்தால் 9 பேர் அனைத்துக் குற்றச்சாட்டுகளிலிருந்தும் முழுமையாக விடுவிக்கப்பட்டுள்ளனர்.

மொஹம்மது நௌஃபர் மௌலவி, மொஹமட் சரீப் ஆதம் லெப்பை (கபூர் மாமா), ஹயாத்து மொஹம்மது அஹமது மில்ஹான், மொஹமட் இப்ராஹிம் சாதிக் அப்துல்லா, மொஹமட் இப்ராஹிம் சாஹிட் அப்துல் ஹக், மொஹமட் அன்வர் மொஹமட் ரிஸ்கான், மொஹமட் மன்சூர் மொஹமட் சனஸ்தீன், அப்துல் மனாஃப் மொஹமட் பிர்தௌஸ், மொஹமட் ரமீஸ் மொஹமட் சாஜித், அப்துல் லத்தீப் மொஹமட் சாஃபி, ஹுஸைனுல் ரிஸ்வி காலித் சமீர், மொஹமட் ஹனீபா செய்னுல் ஆப்தீன், மொஹமட் முஸ்தபா மொஹமட் ஹாரிஸ், ராசிக் ரசா ஹுசைன் மற்றும் கச்சி மொஹம்மது மொஹம்மது ஜெம்சித் ஆகிய 15 பேருக்கே இவ்வாறு கடூழிய சிறைத்தண்டனை விதிக்கப்பட்டுள்ளது.

மொஹமட் சவாஹிர் மொஹமட் ஹசன், மொஹமட் இஃப்திகார் மொஹமட் இன்சாஃப், ரஷீட் மொஹமட் இப்ராஹிம், செய்னுல் ஆப்தீன் மொஹமட் ஜஸீம், மொஹமட் முஸ்தபா மொஹமட் ரிஸ்வான், மீரா சாஹிப் மொஹமட் நஃப்லி, மொஹமட் அமீர் மொஹம்மது அயதுல்லா, மொஹமட் அன்சார்தீன் மொஹமட் ஹில்மி மற்றும் மொஹமட் அக்ரம் அஹ்கம் ஆகிய 9 பிரதிவாதிகளும் குற்றச்சாட்டுகளிலிருந்து விடுவிக்கப்பட்டுள்ளனர். இந்த வழக்கின் 17ஆவது சந்தேகநபரான யாசிம் பாவா அப்துல் ரவூப் வழக்கு விசாரணைகளின் போது உயிரிழந்திருந்தார்.

269 பேர் உயிரிழந்து 500க்கும் மேற்பட்டோர் காயமடைந்த இந்த பயங்கரவாதத் தாக்குதல் தொடர்பில், நௌஃபர் மௌலவி உள்ளிட்ட பிரதிவாதிகளுக்கு எதிராக 23,270க்கும் மேற்பட்ட குற்றச்சாட்டுகளின் கீழ் சட்டமா அதிபரால் 8,900 பக்கங்களைக் கொண்ட குற்றப்பத்திரிகை தாக்கல் செய்யப்பட்டிருந்தது.

வழக்கில் 2,309 சாட்சிகள் சாட்சியமளித்திருந்த நிலையில், கடந்த ஓகஸ்ட் 24ஆம் திகதி சாட்சி விசாரணைகள் நிறைவடைந்தன. இறுதித் தீர்ப்பு அறிவிக்கப்பட்டதை முன்னிட்டு கொழும்பு புதுக்கடை நீதிமன்ற வளாகத்தைச் சுற்றி பொலிஸார், விசேட அதிரடிப்படையினர், மோப்ப நாய்கள் மற்றும் நடமாடும் சிசிடிவி கண்காணிப்பு வாகனங்கள் சகிதம் பலத்த பாதுகாப்பு ஏற்பாடுகள் செய்யப்பட்டிருந்தன.