ஈஸ்டர் தாக்குதல் வழக்கு: நௌபர் மௌலவி உட்பட 15 பேர் குற்றவாளிகள்; 9 பேர் விடுதலை

ஈஸ்டர் ஞாயிறு பயங்கரவாதத் தாக்குதல்கள் தொடர்பில் நௌபர் மௌலவி உள்ளிட்ட 24 பேருக்கு எதிராகத் தாக்கல் செய்யப்பட்ட வழக்கில் 15 பேர் குற்றவாளிகளாக அறிவிக்கப்பட்டுள்ள அதேவேளை, ஒன்பது பேர் முற்றாக விடுதலை செய்யப்பட்டுள்ளனர். 

கொழும்பு நிரந்தர மேல் நீதிமன்றத்தின் நீதியரசர்களான நவரத்னம் மாரசிங்க, இராமநாதன் கண்ணன் மற்றும் சுஜீவ நிசங்க ஆகியோர் அடங்கிய மூவரடங்கிய விசேட நீதியரசர்கள் குழாம் செவ்வாய்க்கிழமை இந்த வரலாற்று முக்கியத்துவம் வாய்ந்த தீர்ப்பை வழங்கியது.

தீர்ப்பு அறிவிக்கப்பட்டதை முன்னிட்டு கொழும்பு புதுக்கடை நீதிமன்ற வளாகத்தில் பல விசேட பொலிஸ் குழுக்கள் குவிக்கப்பட்டு பலத்த பாதுகாப்பு ஏற்பாடுகள் முன்னெடுக்கப்பட்டிருந்தன.

இந்த வழக்கில் மொஹமட் நௌபர் மௌலவி உள்ளிட்ட 24 பேர் பிரதிவாதிகளாகப் பெயரிடப்பட்டிருந்தனர். இவர்களில் 15 பேருக்கு தண்டனை விதிக்கப்பட்டுள்ளதுடன் ஏனைய 9 பேர் வழக்கில் இருந்து விடுவிக்கப்பட்டுள்ளனர்.

பயங்கரவாதத் தடுப்புச் சட்டத்தின் கீழ் சட்டமா அதிபரால் தாக்கல் செய்யப்பட்ட இந்த வழக்கில், தாக்குதல்களுக்கு சதி செய்தமை, உடந்தையாக செயற்பட்டு உதவியமை, ஆயுதங்கள் மற்றும் வெடிபொருட்களைச் சேகரித்தமை உள்ளிட்ட 23,270 குற்றச்சாட்டுகள் சுமத்தப்பட்டிருந்தன. 

கடந்த சுமார் ஐந்து ஆண்டுகளாக நடைபெற்ற இந்த விசாரணைகளில் அரச தரப்பு சார்பில் 2,309 சாட்சிகள் சாட்சியமளித்திருந்தனர். மேலும், குற்றஞ்சாட்டப்பட்டவர்களால் பொலிஸாரிடம் வழங்கப்பட்ட 10 வாக்குமூலங்களை சாட்சியங்களாக ஏற்றுக்கொள்ள நீதிமன்றம் அனுமதி வழங்கியிருந்தது.

அரச தரப்பினால் வெடிபொருட்கள், வெடிபொருள் உற்பத்திக்கு பயன்படும் இரசாயனங்கள், வாள்கள் மற்றும் துப்பாக்கிகள் உள்ளிட்ட 2,076 சான்றுப்பொருட்கள் மன்றில் சமர்ப்பிக்கப்பட்டன. அத்துடன் அரசாங்க பகுப்பாய்வாளர் அறிக்கைகள், டி.என்.ஏ. பரிசோதனை முடிவுகள் மற்றும் நீதித்துறை மருத்துவ அதிகாரிகளின் தடயவியல் அறிக்கைகளும் ஆதாரங்களாக முன்வைக்கப்பட்டன. 

இரு தரப்பு சாட்சிப் பதிவுகளும் கடந்த ஓகஸ்ட் 24ஆம் திகதி நிறைவடைந்து, எழுத்துமூல சமர்ப்பிப்புகள் கையளிக்கப்பட்ட பின்னரே இந்தத் தீர்ப்பு வழங்கப்பட்டுள்ளது.

கடந்த 2019ஆம் ஆண்டு ஏப்ரல் 21ஆம் திகதி நாட்டின் பல பகுதிகளில் உள்ள தேவாலயங்கள் மற்றும் நட்சத்திர விடுதிகளை இலக்கு வைத்து நடத்தப்பட்ட ஒருங்கிணைந்த தற்கொலைத் தாக்குதல்களில் 350-க்கும் மேற்பட்டோர் உயிரிழந்ததுடன் 500-க்கும் மேற்பட்டோர் காயமடைந்தமை குறிப்பிடத்தக்கது.