நீதிமன்றத் தீர்ப்பு வெளியான சில மணி நேரத்தில் 4 வயது மகளைச் சுட்டுக் கொன்றுவிட்டு தாய் எடுத்த தவறான முடிவு!

செய்தி அமெரிக்காவின் டெக்சாஸ் மாகாணத்திலுள்ள ஹூஸ்டன் நகரில், குழந்தை பராமரிப்பு உரிமை தொடர்பான நீதிமன்றத் தீர்ப்பைத் தொடர்ந்து இடம்பெற்ற கொடூரச் சம்பவம் அப்பகுதி மக்களிடையே பெரும் அதிர்ச்சியையும் சோகத்தையும் ஏற்படுத்தியுள்ளது.

நீதிமன்றம் வழங்கிய உத்தரவால் கடுமையான அதிருப்தியும் மன உளைச்சலும் அடைந்த 35 வயதுடைய சிபெல்லா சவெல்லா என்ற தாய், தனது 4 வயதுப் பெண் குழந்தையான விவியனைத் துப்பாக்கியால் சுட்டுக் கொன்றுவிட்டு, அதே ஆயுதத்தால் தானும் சுட்டுக்கொண்டு உயிரை மாய்த்துக் கொண்டுள்ளார்.

விவியனைப் பராமரிக்கும் சட்டப்பூர்வ உரிமை தொடர்பாகப் பெற்றோரிடையே நீதிமன்றத்தில் தொடரப்பட்டிருந்த வழக்கின் இறுதி விசாரணையின்போது, சிறுமியின் முதன்மைப் பராமரிப்பு உரிமையை அவளது தந்தை ஆரோன் சவெல்லாவிடம் ஒப்படைத்து நீதிமன்றம் தீர்ப்பளித்தது.

அத்துடன், தாய் சிபெல்லா தனது குழந்தையை நேரில் சந்திக்க விரும்பினால், அதிகாரப்பூர்வக் கண்காணிப்பாளரின் நேரடி மேற்பார்வையில் மட்டுமே சந்திக்க அனுமதிக்கப்பட வேண்டும் எனவும் கடுமையான நிபந்தனைகள் விதிக்கப்பட்டிருந்தன.

நீதிமன்றத்தின் இந்த அதிரடி உத்தரவு வெளியான சில மணித்தியாலங்களிலேயே எல்லைமீறிய மன அழுத்தத்திற்கு உள்ளான சிபெல்லா, இத்தகைய விபரீத முடிவை எடுத்துள்ளார்.

கைத்துப்பாக்கியைப் பயன்படுத்தித் தனது பச்சிளங் குழந்தையைக் கொடூரமாகச் சுட்டுக் கொன்ற அவர், அடுத்த கணமே தானும் தற்கொலை செய்துகொண்டதாக முதற்கட்ட விசாரணைகளில் தெரியவந்துள்ளது. இச்சம்பவம் தொடர்பில் ஹூஸ்டன் நகரக் காவல்துறையினர் தீவிர விசாரணைகளை முன்னெடுத்து வருகின்றனர்.