ஞானசார தேரருக்கு நாளை வரை விளக்கமறியல்! மேன்முறையீட்டு நீதிமன்றில் முன்னிலைப்படுத்த உத்தரவு
பொதுபல சேனா அமைப்பின் பொதுச் செயலாளர் கலகொட அத்தே ஞானசார தேரரை நாளை வரை விளக்கமறியலில் வைக்கவும், மேன்முறையீட்டு நீதிமன்றில் முன்னிலைப்படுத்தவும் உத்தரவு.
கலகொட அத்தே ஞானசார தேரரை நாளை (05) வரை விளக்கமறியலில் வைக்குமாறு கொழும்பு நீதவான் நீதிமன்றம் உத்தரவு பிறப்பித்துள்ளது.
கொழும்பு குற்றத்தடுப்புப் பிரிவின் (CCD) விசேட பொலிஸ் குழுவினரால் கைது செய்யப்பட்டு, உரிய சட்ட நடவடிக்கைகளுக்காக நீதிமன்றத்தில் முன்னிலைப்படுத்தப்பட்ட போதே நீதவான் இந்த உத்தரவைப் பிறப்பித்தார்.
அத்துடன், ஞானசார தேரரை நாளைய தினம் மேன்முறையீட்டு நீதிமன்றத்தில் முன்னிலைப்படுத்துவதற்குத் தேவையான அனைத்து ஏற்பாடுகளையும் உடன் மேற்கொள்ளுமாறு சம்பந்தப்பட்ட அதிகாரிகளுக்குக் கொழும்பு நீதவான் நீதிமன்றம் பணிப்புரை விடுத்துள்ளது.
நீதிமன்ற அவமதிப்பு வழக்கில் அவருக்கு எதிராகப் பகிரங்க பிடியாணை பிறப்பிக்கப்பட்டிருந்த நிலையில் கைது செய்யப்பட்டு, கொழும்பு நீதவான் நீதிமன்றில் ஆஜர்படுத்தப்பட்டதை அடுத்து இந்த விளக்கமறியல் உத்தரவு பிறப்பிக்கப்பட்டுள்ளது.
