சிஎஸ்கேவுக்கு ஆப்பு வைக்க புது விதிமுறை - ஹர்திக், சாய் கிஷோர் டிரேடில் பிசிசிஐ அதிரடி?
ஐபிஎல் 2027 டிரேடிங்கில் சிஎஸ்கே அணி ஹர்திக் பாண்டியா மற்றும் சாய் கிஷோரை தங்கள் அணிக்கு வாங்க தீவிர முயற்சியில் ஈடுபட்டுள்ளது. இரு வீரர்களும் சிஎஸ்கேவில் சேர விருப்பம் தெரிவித்துள்ள நிலையில், மும்பை இந்தியன்ஸ் அணி நிர்வாகம் இதற்கு எதிராக பிசிசிஐயிடம் புதிய விதிமுறை கோரியுள்ளது. இது குறித்து விரிவாகப் பார்க்கலாம்.
2027 ஐபிஎல் சீசனுக்கான டிரேடிங் பரபரப்பு தொடங்கியுள்ள நிலையில், சென்னை சூப்பர் கிங்ஸ் (சிஎஸ்கே) அணி நிர்வாகம் தீவிரமாக செயல்பட்டு வருகிறது. மும்பை இந்தியன்ஸ் அணியின் கேப்டன் ஹர்திக் பாண்டியாவையும், குஜராத் டைடன்ஸ் அணியின் சுழற்பந்து வீச்சாளர் சாய் கிஷோரையும் தங்கள் அணிக்கு வாங்க சிஎஸ்கே நிர்வாகம் முயற்சித்து வருவதாக தகவல்கள் வெளியாகியுள்ளன.
இதில் சிஎஸ்கே அணிக்கு சாதகமான விஷயம் என்னவென்றால், இந்த இரு வீரர்களும் தானாக முன்வந்து சிஎஸ்கேவில் சேர விருப்பம் தெரிவித்துள்ளனர். ஹர்திக் பாண்டியா, மும்பை இந்தியன்ஸ் நிர்வாகத்தை தொடர்புகொண்டு, தன்னை சிஎஸ்கேவுக்கு டிரேட் செய்யுமாறு அல்லது ஏலத்திற்கு அனுப்புமாறு கேட்டுக் கொண்டுள்ளார். மேலும், மற்ற எந்த அணிக்கும் டிரேட் மூலம் செல்ல தனக்கு விருப்பம் இல்லை எனவும் அவர் தெரிவித்துள்ளதாக கூறப்படுகிறது.
இதேபோல், குஜராத் டைடன்ஸ் அணியில் போதிய வாய்ப்புகள் கிடைக்காததால், சாய் கிஷோர் சிஎஸ்கேவில் சேர விரும்புவதாக தகவல்கள் தெரிவிக்கின்றன. ஐபிஎல் 2026 சீசனில் வெறும் மூன்று போட்டிகளில் மட்டுமே அவருக்கு வாய்ப்பு கிடைத்தது. சிஎஸ்கே அணியில் சுழற்பந்து வீச்சு ஆல்ரவுண்டர் இடம் காலியாக இருப்பதால், தன்னை டிரேட் மூலம் சிஎஸ்கேவுக்கு அனுப்புமாறு சாய் கிஷோர் கோரிக்கை வைத்துள்ளார்.
இரு வீரர்களும் சிஎஸ்கேவில் சேர விரும்பும் நிலையில், அந்த அணி நிர்வாகம் கடுமையான நிலைப்பாட்டை எடுத்துள்ளது. ஹர்திக் பாண்டியாவுக்கு மாற்றாக இளம் வீரர்களை கொடுக்க முடியாது என்றும், ஷிவம் துபே மற்றும் கலீல் அகமது ஆகியோரை மட்டுமே கொடுக்க முடியும் என்றும் சிஎஸ்கே நிர்வாகம் உறுதியாக உள்ளது.
இந்நிலையில், மும்பை இந்தியன்ஸ் அணி நிர்வாகம் பிசிசிஐயை அணுகி புதிய விதிமுறை கோரியுள்ளது. ஒரு வீரர், தான் எந்த அணிக்கு டிரேட் ஆக வேண்டும் என முடிவு செய்வதும், அந்த அணிக்கு மட்டுமே செல்வேன் என அடம்பிடிப்பதும் தவறான நடைமுறை என்று அவர்கள் கருதுகின்றனர். இது சூதாட்ட புகாருக்கு ஒப்பான ஒரு விஷயம் என்றும், இதனால் அணிகளுக்கு நெருக்கடி ஏற்படுவதாகவும் அவர்கள் கூறுகின்றனர்.
எனவே, இனி ஒரு வீரர் டிரேடில் ஒரு குறிப்பிட்ட அணிக்கு மட்டுமே செல்வேன் என கூறி அணிக்கு நெருக்கடி கொடுக்க கூடாது. அவ்வாறு நெருக்கடி கொடுத்தால், அந்த வீரர் மீது கிரிக்கெட் சூதாட்ட புகார் பாயும் என புது விதிமுறையை வகுக்க வேண்டும் என மும்பை இந்தியன்ஸ் நிர்வாகிகள் பிசிசிஐயிடம் கோரிக்கை விடுத்துள்ளனர். இதுகுறித்து விரைவில் பரிசீலித்து பொருத்தமான முடிவை எடுத்து அறிவிப்பதாக பிசிசிஐ நிர்வாகிகள் தெரிவித்துள்ளதாக தகவல்கள் வெளியாகியுள்ளன.
இந்தப் புதிய விதிமுறை குறித்த அதிகாரப்பூர்வ அறிவிப்பு வெளியாகும் வரை, ஹர்திக் பாண்டியா மற்றும் சாய் கிஷோரின் டிரேட் குறித்த விவாதங்கள் தொடரும் என எதிர்பார்க்கப்படுகிறது.
