என்னிடம் ஏதோ ஒன்றைப் பார்த்தார் கோலி: ஆர்சிபி வெற்றிக் கதைக்குப் பின்னால் உள்ள ரகசியத்தை உடைத்த ரஜத் படிதார்!

இந்தியன் பிரீமியர் லீக் (ஐபிஎல்) கிரிக்கெட் வரலாற்றில் ரோயல் சேலஞ்சர்ஸ் பெங்களூரு (ஆர்சிபி) அணிக்கு எப்போதும் ஒரு தனித்துவமான இடமும் உலகளாவிய அளவில் மிகப்பெரிய ரசிகர் பட்டாளமும் உண்டு. பல நட்சத்திர வீரர்கள் விளையாடிய போதிலும் பல ஆண்டுகளாக அந்த அணிக்கு எட்டாக் கனியாக இருந்த ஐபிஎல் சம்பியன் கிண்ணக் குறைக்கு கடந்த 2025 ஆம் ஆண்டு முற்றுப்புள்ளி வைக்கப்பட்டது.

அந்த வரலாற்றுச் சிறப்புமிக்க வெற்றிப் பயணத்தின் மிக முக்கியமான கதாநாயகர்களில் ஒருவராகத் திகழ்ந்தவர் ரஜத் படிதார். எதிர்பாராத சூழலில் ஆர்சிபி அணியின் தலைமைப் பொறுப்பு அவரிடம் ஒப்படைக்கப்பட்ட போது ஒட்டுமொத்த கிரிக்கெட் உலகமும் ஆச்சரியத்தில் ஆழ்ந்தது. ஏனெனில், அதற்கு சற்று முன்னர்தான் அவர் உள்நாட்டுப் போட்டிகளில் தனது தலைமைத்துவ அனுபவத்தைத் தொடங்கியிருந்தார். விராட் கோலி போன்ற கிரிக்கெட் உலகின் மாபெரும் ஜாம்பவான் அணியில் இருக்கும்போது, ஒரு இளம் வீரராக புதிய தலைவர் பதவியை ஏற்பது எளிய காரியமல்ல. ஆனால் அந்த சவாலான தருணத்தில் படிதாருக்கு பேராதரவாகவும் நம்பிக்கையாகவும் நின்றவர் விராட் கோலி.

சமீபத்தில் வழங்கிய பிரத்யேக நேர்காணல் ஒன்றில் இதுபற்றி மனம் திறந்துள்ள ரஜத் படிதார், விராட் கோலியை தனது கிரிக்கெட் வாழ்வின் மிகச்சிறந்த முன்மாதிரியாகக் கருதுவதாகத் தெரிவித்துள்ளார். களத்தில் கோலி வெளிப்படுத்தும் அபார ஆட்டத்திறன் மட்டுமன்றி, களத்திற்கு வெளியே அவர் கடைப்பிடிக்கும் தீவிர ஒழுக்கம், உடற்தகுதி மற்றும் நேர்மறைப் பழக்கவழக்கங்கள் ஆகியவற்றை தான் உன்னிப்பாக கவனித்து கற்றுக்கொண்டதாக படிதார் குறிப்பிட்டுள்ளார்.

ஆர்சிபி நிர்வாகம் தன்னை தலைவராக நியமித்த முடிவிற்கு விராட் கோலி தொடக்கம் முதலே முழு ஆதரவையும் வழங்கியதை தான் பின்னர் அறிந்து கொண்டதாக படிதார் நெகிழ்ச்சியுடன் பகிர்ந்துள்ளார். ஆர்சிபி போன்ற உலகப்புகழ்பெற்ற அணியின் தலைமைப் பொறுப்பை ஒருவரிடம் ஒப்படைப்பது சாதாரண விடயமல்ல என்றும், விராட் கோலி தன்னிடம் ஏதோ ஒரு தனித்துவமான திறனைக் கண்டிருக்க வேண்டும் என்றும் அவர் குறிப்பிட்டுள்ளார். தான் முன்மாதிரியாக வணங்கும் ஒரு தலைவரிடமிருந்து முழுமையான ஆதரவும் நம்பிக்கையும் கிடைக்கும்போது வேறு எவரது ஆதரவும் தனக்குத் தேவையில்லை என்றும் அவர் ஆணித்தரமாகத் தெரிவித்துள்ளார்.

விராட் கோலியின் அசைக்க முடியாத நம்பிக்கைக்கு படிதார் ஆடுகளத்தில் கொடுத்த பதிலடி மகத்தானது. அவரது தலைமையில் 2025 ஆம் ஆண்டு தனது கன்னி ஐபிஎல் கிண்ணத்தை முத்தமிட்ட ஆர்சிபி அணி, அடுத்த ஆண்டான 2026 இலும் அதே அதிரடியைத் தொடர்ந்து அடுத்தடுத்து இரண்டு முறை சம்பியன் பட்டத்தைத் தக்கவைத்து வரலாற்று சாதனை படைத்தது.

தற்போது இரண்டு ஆண்டுகளில் இரண்டு முறை சம்பியன் என்ற பெருமிதத்துடன் கம்பீரமாக நிற்கும் ஆர்சிபி அணி, அடுத்ததாக 2027 ஆம் ஆண்டு தொடர்ச்சியாக மூன்றாவது முறையாக கிண்ணத்தை வென்று ஹாட்ரிக் சாதனை படைக்கும் ஒற்றை இலக்குடன் தயாராகி வருகிறது. ஒரு காலத்தில் கிண்ணம் எப்போது கிடைக்கும் என்ற ஏக்கத்தில் இருந்த ஆர்சிபி, இன்று தொடர் சாதனைகளைப் படைக்கும் வெற்றிப் பாதையில் நடைபோடுவது ரசிகர்களைப் பெரும் உற்சாகத்தில் ஆழ்த்தியுள்ளது.