பிக் பாஸ் மேடையிலேயே வெளியேற்றப்பட்ட பிரசாந்த் ரங்கசாமி: பின்னணி என்ன?

விஜய் சேதுபதி தொகுத்து வழங்கும் பிக் பாஸ் நிகழ்ச்சியின் புதிய சீசனில், யூடியூப் திரைப்பட விமர்சகர் பிரசாந்த் ரங்கசாமி மேடையிலேயே வெளியேற்றப்பட்டது சமூக வலைத்தளங்களில் விவாதங்களை ஏற்படுத்தியுள்ளது.

வழக்கமான நடைமுறையை மாற்றி, மேடையிலேயே பார்வையாளர்களின் நேரடி வாக்கெடுப்பு மூலம் போட்டியாளர்களை வெளியேற்றும் புதிய முறையின் அடிப்படையில் சுமார் ஒன்பது போட்டியாளர்கள் உள்ளே செல்ல முடியாமல் வெளியேற்றப்பட்டனர். இதில் பிரசாந்த் ரங்கசாமியும் குறைந்த வாக்கு வித்தியாசத்தில் வீட்டிற்குள் நுழையும் வாய்ப்பை இழந்தார்.

முன்னதாக பிக் பாஸ் நிகழ்ச்சியின் சாமானியர்களுக்கான தெரிவுப் போட்டிகள் மற்றும் டாஸ்க்குகளைக் கடுமையாக விமர்சித்து பிரசாந்த் ரங்கசாமி வீடியோ வெளியிட்டிருந்தார். மான ரோஷம் இருந்தால் இந்த நிகழ்ச்சிக்குச் செல்வார்களா என்று கேள்வி எழுப்பியிருந்த அவரே தற்போது போட்டியாளராகப் பங்கேற்க வந்து மேடையிலேயே வெளியேறியது பரவலான விமர்சனங்களுக்கு உள்ளாகியுள்ளது.

பிக் பாஸ் இரசிகர்களை அவர் முன்னரே விமர்சித்திருந்ததால் அவருக்கு வாக்குகள் கிடைக்கவில்லையா அல்லது நிகழ்ச்சி நிர்வாகமே திட்டமிட்டு வெளியேற்றியதா என இருவேறு கருத்துகள் பகிரப்பட்டு வருகின்றன.

அவர் வெளியேறும் தருணத்தில் தொகுப்பாளர் விஜய் சேதுபதி, இதனை நீங்கள் விமர்சனம் செய்ய மாட்டீர்களே என்று குறிப்பிட்டதும் விவாதப் பொருளாகியுள்ளது. சமூக வலைத்தளங்களில் ஒரு தரப்பினர் அவருக்கு ஆதரவாகவும், மற்றொரு தரப்பினர் இந்த வெளியேற்றத்தைக் கேலி செய்தும் பதிவிட்டு வருகின்றனர்.

அதேவேளையில், முந்தைய சீசன்களில் சர்ச்சைக்குரிய பிரபலங்கள் உள்ளே அனுப்பப்பட்டது போல, பிரசாந்த் ரங்கசாமியும் விரைவில் வைல்டு கார்டு முறையில் பிக் பாஸ் வீட்டிற்குள் வரக்கூடும் என்ற எதிர்பார்ப்பும் நிலவுகிறது.