பிக் பாஸ் தமிழ் சீசன் 10: 19 போட்டியாளர்களுடன் கோலாகலமாகத் தொடங்கியது புதிய சீசன்

சின்னத்திரையின் பிரம்மாண்ட ரியாலிட்டி நிகழ்ச்சியான பிக் பாஸ் தமிழ் சீசன் 10 புதிய விதிமுறைகளுடன் கோலாகலமாகத் தொடங்கியுள்ளது.

இம்முறை மேடையிலேயே மூன்று போட்டியாளர்களை நிறுத்தி, நேரடி பார்வையாளர் வாக்கெடுப்பு நடத்தி, அதிக வாக்குகளைப் பெற்றவர்களை பிக் பாஸ் வீட்டிற்குள் அனுப்பி வைக்கும் புதிய நடைமுறையைத் தொகுப்பாளர் விஜய் சேதுபதி அறிமுகப்படுத்தியுள்ளார். 

சினிமா மற்றும் சின்னத்திரை நட்சத்திரங்கள், டிஜிட்டல் தளப் பிரபலங்கள் மற்றும் வரலாற்றிலேயே முதல்முறையாகப் பொதுமக்களிலிருந்து தேர்வானவர்கள் என மொத்தம் 19 போட்டியாளர்கள் இந்த சீசனில் களமிறங்கியுள்ளனர்.

சின்னத்திரை மற்றும் சினிமா உலகிலிருந்து மகாநதி சீரியல் புகழ் லட்சுமி பிரியா, சித்து +2 திரைப்பட நடிகை சாந்தினி தமிழரசன், அங்காடித் தெரு திரைப்பட நகைச்சுவை நடிகர் பிளாக் பாண்டி, தென்றல் வந்து என்னை தொடும் சீரியல் நடிகர் வினோத் பாபு, பாண்டியன் ஸ்டோர்ஸ் தொடரில் நடித்த குமரன், பல்வேறு துறைகளில் திறமை கொண்ட ராகவன் ரகுநாதன், சமூக வலைத்தளப் பிரபலம் மற்றும் நடிகை முத்தழகி, மகாநதி மற்றும் பாண்டியன் ஸ்டோர்ஸ் 2 தொடர்களில் நடித்த ஷாதிகா ஆகியோர் பிக் பாஸ் இல்லத்திற்குள் நுழைந்துள்ளனர்.

இவர்களுடன், ஜெர்மனியைச் சேர்ந்த நகைச்சுவை உள்ளடக்கப் படைப்பாளர் சேலம் பிரித்திவிநாத், ரெசாட் வெப் சீரிஸ் புகழ் தான்யா, பிரபலங்களின் ஒப்பனைக் கலைஞர் அஷ்மிதா, பார்வையாளர் வாக்கெடுப்பில் வெற்றி பெற்ற அவினாஷ், விஜய் தொலைக்காட்சியின் தொழில்முறைக் கலைஞர் முகேஷ், குக் வித் கோமாளி பிரபலம் அன்சார், இளம் போட்டியாளர் ஸ்வாமிகா மற்றும் டிஜிட்டல் உள்ளடக்கப் படைப்பாளர் ஜாவித் ஆகியோரும் போட்டியாளர்களாகப் பங்கேற்றுள்ளனர்.

சுமார் ஒரு இலட்சத்திற்கும் மேற்பட்ட விண்ணப்பங்களிலிருந்து தெரிவு செய்யப்பட்டு, பல்வேறு சவால்களைக் கடந்து பொதுமக்களின் பிரதிநிதிகளாக முனியம்மா, ஜேசன் மற்றும் ஷமா ஆகிய மூவர் இந்த சீசனில் இடம்பிடித்துள்ளனர்.

பழைய அறிமுகங்கள், புதிய நட்புகள் மற்றும் பிரபலங்களுக்கு மத்தியில் சாமானிய மக்களின் போட்டி என முதல் நாளிலேயே இந்த சீசன் மீதான எதிர்பார்ப்பு பார்வையாளர்களிடையே அதிகரித்துள்ளது.