டெல்லி போட்டியிலும் தோனி இல்லை: முழு உடற்தகுதி இன்னும் எட்டாததால் ஓய்வு தொடர்கிறது

சென்னை சூப்பர் கிங்ஸ் அணி, IPL 2026 தொடரில் இதுவரை 9 போட்டிகளில் விளையாடி 4 வெற்றிகளுடன் 8 புள்ளிகளைப் பெற்று புள்ளிப்பட்டியலில் ஆறாவது இடத்தில் உள்ளது. ருதுராஜ் கெய்க்வாட் தலைமையிலான இந்த அணிக்கு, மீதமுள்ள 5 போட்டிகளும் மிகவும் முக்கியமானதாக மாறியுள்ளது. பிளேஆஃப் வாய்ப்பை உயிர்ப்புடன் வைத்திருக்க அவற்றில் வெற்றி அவசியமாகியுள்ளது.

இந்த நிலையில், எம்.எஸ். தோனி எப்போது அணிக்குத் திரும்புவார் என்ற எதிர்பார்ப்பு ரசிகர்களிடையே அதிகமாக உள்ளது. கணுக்கால் பகுதியில் ஏற்பட்ட காயம் காரணமாக, இந்த சீசன் தொடக்கத்திலிருந்தே அவர் ஓய்வில் உள்ளார். இதுவரை நடைபெற்ற 9 போட்டிகளிலும் அவர் விளையாடவில்லை.

அடுத்ததாக மே 6ஆம் தேதி டெல்லி கேபிட்டல்ஸ் அணிக்கு எதிராக டெல்லியில் நடைபெறவுள்ள போட்டியிலும் தோனி பங்கேற்கமாட்டார் என தகவல் வெளியாகியுள்ளது. இது ரசிகர்களுக்கு ஏமாற்றமாக இருந்தாலும், அவரது உடல்நிலை முன்னேற்றத்தை கருத்தில் கொண்டு இந்த முடிவு எடுக்கப்பட்டுள்ளதாக கூறப்படுகிறது.

தோனி தற்போது காயத்திலிருந்து மீண்டு வருகிறார். ஆனால் இன்னும் முழுமையான உடற்தகுதியை அடையவில்லை. அதனால் அவசரப்படுத்தாமல், 100% ஃபிட்னஸ் அடைந்த பிறகே அவரை களமிறக்க வேண்டும் என்று அணி நிர்வாகமும், தோனியும் ஒரே கருத்தில் உள்ளனர். இதன் காரணமாக, டெல்லி பயணத்தை தவிர்த்து சென்னையிலேயே இருந்து சிகிச்சை மற்றும் பயிற்சியில் கவனம் செலுத்த அவர் முடிவு செய்துள்ளதாக தகவல்கள் தெரிவிக்கின்றன.

முக்கியமான கட்டத்தை நோக்கி நகரும் இந்த தொடரில், தோனியின் திரும்புவது சென்னை அணிக்கு மிகப்பெரிய பலமாக இருக்கும் என்பதால், அவரது ஃபிட்னஸ் மீட்பு ரசிகர்களின் கவனத்தை ஈர்த்துள்ளது.