FIFA World Cup: 96 ஆண்டுகால சாதனையை முறியடித்த 17 வயது மோரா – மெக்சிகோவின் புதிய வரலாறு!

கில்பர்டோ மோரா, மெக்சிகோ கால்பந்து வரலாற்றில் 96 ஆண்டுகால சாதனையை முறியடித்து புதிய வரலாறு படைத்துள்ளார். தென் ஆப்பிரிக்காவுக்கு எதிரான உலகக் கோப்பை தொடக்க ஆட்டத்தில் அவர் களமிறங்கியதன் மூலம், மெக்சிகோ அணிக்காக உலகக் கோப்பையில் விளையாடிய மிக இளம் வயது வீரர் என்ற பெருமையை அவர் பெற்றார்.

மெக்சிகோ கால்பந்து அணி மற்றும் தென் ஆப்பிரிக்கா அணிகள் மோதிய இந்த போட்டியில், 65ஆவது நிமிடத்தில் மாற்று வீரராக களமிறங்கிய மோரா, வெறும் 17 வயது 240 நாட்களில் இந்த சாதனையை எட்டினார். இதற்கு முன்பு 1930ஆம் ஆண்டு நடந்த உலகக் கோப்பையில் மானுவல் ரோசாஸ் (18 வயது 134 நாட்கள்) வைத்திருந்த மெக்சிகோவின் சாதனையை அவர் 96 ஆண்டுகளுக்குப் பிறகு முறியடித்துள்ளார்.

மெக்சிகோவின் சியாபாஸ் பகுதியில் பிறந்த மோரா, கிளப் டிஜுவானா அகாடமி மூலம் வளர்ச்சி பெற்றவர். குறுகிய காலத்திலேயே உள்ளூர் லீக்கில் 50-க்கும் மேற்பட்ட போட்டிகளில் விளையாடி கோல் மற்றும் அசிஸ்ட்களுடன் தனது திறமையை நிரூபித்துள்ளார். அவரது திறமையை கவனித்த தேசிய அணியின் பயிற்சியாளர் ஜாவியர் அகுய்ரே, அவருக்கு உலகக் கோப்பை அணியில் இடம் வழங்கினார்.

2025ஆம் ஆண்டில் தேசிய அணியில் அறிமுகமான மிக இளம் வீரர் என்ற சாதனையும் மோராவுக்கு சொந்தமானது. மேலும், கோல்டு கோப்பை வெற்றியில் முக்கிய பங்கு வகித்ததன் மூலம் அவர் மெக்சிகோ கால்பந்தில் எதிர்கால நட்சத்திரமாக உயர்ந்துள்ளார். இம்முறை உலகக் கோப்பை தொடரில் பங்கேற்கும் வீரர்களில் இவரே மிக இளம் வயது வீரர் என்பதும் குறிப்பிடத்தக்கது.

இந்த தொடரில் அவர் கோல் அடித்தால், பீலேவுக்குப் பிறகு உலகக் கோப்பை வரலாற்றில் இரண்டாவது மிக இளம் கோல் ஸ்கோரர் என்ற சாதனையையும் பதிவு செய்ய வாய்ப்பு உள்ளது. இந்த ஆட்டத்தில் மெக்சிகோ 2-0 என்ற கோல் கணக்கில் வெற்றி பெற்ற நிலையில், மோராவின் வருகை அணிக்கு புதிய உற்சாகத்தை அளித்துள்ளது.