டி20 கிரிக்கெட்டில் விராட் கோலி படைத்த வரலாறு; 211 முறை 50+ பார்ட்னர்ஷிப்புடன் புதிய உலக சாதனை!

டி20 கிரிக்கெட்டில் தனது அசத்தலான பயணத்தில் மேலும் ஒரு மைல்கல்லை எட்டியுள்ளார் விராட் கோலி. ஐபிஎல் 2026 லீக் கட்டத்தின் 67-வது போட்டியில், சன்ரைசர்ஸ் ஐதராபாத் அணிக்கு எதிராக, இவர் வெங்கடேஷ் அய்யருடன் இணைந்து அமைத்த தொடக்க விக்கெட் கூட்டணி கிரிக்கெட் வரலாற்றில் மறக்க முடியாத ஒன்றாக மாறியுள்ளது.

256 ரன்களை எதிர்கொண்டு விளையாடிய ராயல் சேலஞ்சர்ஸ் பெங்களூரு அணிக்காக கோலியும் அய்யரும் அபாரமான தொடக்கத்தை அளித்தனர். இவர்களிருவரும் இணைந்து 4.2 ஓவர்களில் 60 ரன்கள் குவித்தனர். இதுவே விராட் கோலியின் டி20 கிரிக்கெட் வாழ்க்கையில் 211-வது 50+ பார்ட்னர்ஷிப்பாகும்.

இதற்கு முன்னதாக, கடந்த ஞாயிற்றுக்கிழமை பஞ்சாப் கிங்ஸ் அணிக்கு எதிராக தேவதூத் படிக்கல்லுடன் இணைந்து 76 ரன்கள் சேர்த்து 210-வது 50+ பார்ட்னர்ஷிப்பை பூர்த்தி செய்து, அலெக்ஸ் ஹேல்ஸுடன் இணைந்து உச்சியில் இருந்தார்.

இன்றைய சாதனையுடன், 211 (கோலி) - 210 (ஹேல்ஸ்) என்ற கணக்கில் அதிகூடிய 50+ பார்ட்னர்ஷிப்புகள் கொண்ட வீரர்கள் பட்டியலில் கோலி தனியாக முதலிடத்தை பிடித்துள்ளார். இதற்கு அடுத்த இடங்களில் டேவிட் வார்னர் (200), பாபர் அசாம் (196) மற்றும் கிறிஸ் கெயில் (191) ஆகியோர் உள்ளனர்.

போட்டியை பொறுத்தவரை, முதலில் பேட்டிங் செய்த சன்ரைசர்ஸ் ஐதராபாத் அணி அதிரடியாக விளையாடி 20 ஓவர்களில் 4 விக்கெட்டுகளை மட்டுமே இழந்து 255 ரன்கள் குவித்தது. இஷான் கிஷன் (79), அபிஷேக் ஷர்மா (56) மற்றும் ஹென்ரிட்ச் கிளாசன் (51) ஆகியோர் அசத்தினர்.

255 ரன்கள் இலக்கை துரத்திய ராயல் சேலஞ்சர்ஸ் பெங்களூரு அணியால் 200 ரன்கள் மட்டுமே எட்ட முடிந்தது. ரஜத் படிதார் (56) மற்றும் க்ருனால் பாண்டியா (41*) சிறப்பாக விளையாடியும் வெற்றி கிட்டவில்லை. இதனால் ஆர்சிபி 55 ரன்கள் வித்தியாசத்தில் தோல்வியடைந்தது.

இந்தச் சாதனையானது, வயது ஒரு தடையல்ல என்பதையும், டி20 கிரிக்கெட்டில் விராட் கோலியின் நிலையான திறமையையும் மீண்டும் நிரூபித்துள்ளது. அவரது ஆட்ட புத்திசாலித்தனமும், தொடர்ந்து பார்ட்னர்களுடன் இணைந்து அணிக்கு வலுவான தொடக்கத்தை கொடுக்கும் அவரது திறனும் இந்தச் சாதனை மூலம் பறைசாற்றப்படுகிறது.