மோட்டார் சைக்கிளிலேயே பிரசவித்த தாய்! வியட்நாமில் நிகழ்ந்த அதிசய சம்பவம் - வீடியோ வைரல்

வியட்நாமின் தாய் குவாங் மாகாணம், புலுவாங் பகுதியில் அமைந்துள்ள ஒரு மருத்துவமனையின் வாசலில், பார்த்துக் கொண்டிருக்கும் போதே ஒரு பெண் தனது குழந்தையைப் பெற்றெடுத்த அதிசய சம்பவம் நிகழ்ந்துள்ளது.

25 வயதான நிறைமாத கர்ப்பிணிப் பெண் ஒருவர், திடீரென ஏற்பட்ட கடுமையான வயிற்று வலியால் அவதிப்பட்டார். இதையடுத்து, அவரது கணவர் உடனடியாக தனது மோட்டார் சைக்கிளில் மனைவியை ஏற்றிக்கொண்டு அருகிலுள்ள ஆஸ்பத்திரிக்கு விரைந்தார்.

ஆஸ்பத்திரியை அடைவதற்கு சில விநாடிகளுக்கு முன்பே, பிரசவ வலி உச்சத்தை அடைந்ததால், மோட்டார் சைக்கிளின் பின் இருக்கையிலேயே அந்தப் பெண் ஒரு பெண் குழந்தையைப் பெற்றெடுத்தார்.

இந்த நெகிழ்ச்சிகரமான தருணம், அங்கு பணியில் இருந்த மருத்துவர்கள் மற்றும் செவிலியர்களின் விரைவான செயல்பாட்டுக்கு சாட்சியாக அமைந்தது. உடனடியாக ஓடிவந்த மருத்துவக் குழுவினர், தாய் மற்றும் சிசு இருவரையும் பாதுகாப்பாக மீட்டு, அவசர சிகிச்சைப் பிரிவுக்கு அழைத்துச் சென்றனர். தற்போது தாய் மற்றும் குழந்தை இருவரும் நலமுடன் இருப்பதாக மருத்துவர்கள் உறுதிப்படுத்தியுள்ளனர்.

இந்த அரிய நிகழ்வு முழுவதும் பாதுகாப்பு கேமராவில் பதிவாகியுள்ளது. அந்த வீடியோ காட்சிகள் தற்போது சமூக வலைதளங்களில் வேகமாகப் பரவி வருகின்றன. லட்சக்கணக்கான பார்வையாளர்கள் இந்தச் செய்தியைப் பார்த்து, அந்தத் தாயின் மன உறுதியையும், மருத்துவ ஊழியர்களின் உடனடி மீட்பு நடவடிக்கையையும் பாராட்டி வருகின்றனர்.

பலரும், "ஆஸ்பத்திரி வாசலில் பிறந்த குழந்தை அதிர்ஷ்டசாலி" எனவும், "தாயின் தைரியம் போற்றத்தக்கது" எனவும் கருத்து தெரிவித்து வருகின்றனர்.