“போர் விரைவில் முடிவுக்கு வரும்” – டிரம்ப் நம்பிக்கை; ஹோர்முஸ் நீரிணை பேச்சுவார்த்தை தீவிரம்!

அமெரிக்க ஜனாதிபதி டொனால்ட் டிரம்ப், ஈரானில் நடைபெற்று வரும் போர் விரைவில் முடிவுக்கு வரும் என்ற நம்பிக்கையை தெரிவித்துள்ளார். உலகளாவிய மற்றும் அமெரிக்காவின் எரிசக்தி விலைகள் குறித்து செய்தியாளர்களின் கேள்விகளுக்கு பதிலளித்த அவர், "இந்தப் போர் இன்னும் நீண்ட காலம் நீடிக்கும் என்று நான் நினைக்கவில்லை. இது விரைவில் முடிவுக்கு வரும்" என்று குறிப்பிட்டுள்ளார்.

"போர் முடிந்தவுடன், எண்ணெய் விலைகளை மீண்டும் மிகக் குறைந்த அளவிற்கு கொண்டு வர முடியும். ஈரானால் இனி நீண்ட காலம் போரைத் தொடர முடியாது" என்றும் டிரம்ப் தெரிவித்துள்ளார். பல மாதங்கள் நீடித்த போரின் காரணமாக, அமெரிக்க ராணுவத்தில் சில வெடிமருந்துகளின் விநியோகத்தில் இறுக்கம் ஏற்பட்டுள்ளதையும் அவர் ஒப்புக்கொண்டார்.

இதற்கிடையில், முக்கிய கடல் வர்த்தகப் பாதையான ஹோர்முஸ் நீரிணை (Strait of Hormuz) வழியாக வர்த்தகக் கப்பல்கள் பாதுகாப்பாகச் செல்லும் வகையில், ஓமான் நாட்டின் மத்தியஸ்தத்துடன் ஈரான் பேச்சுவார்த்தை நடத்தி வருவதாக தகவல்கள் தெரிவிக்கின்றன. இந்த பேச்சுவார்த்தைகள் மூலம், நீரிணையை மீண்டும் திறப்பது தொடர்பான ஒப்பந்தம் விரைவில் எட்டப்படும் என்று எதிர்பார்க்கப்படுகிறது.

இரு தரப்புக்கும் ஏற்ற ஒப்பந்தம் எட்டப்படுவதற்கான சூழல் உருவாகி வருவதாகவும் கூறப்படுகிறது. எவ்வாறாயினும், அமெரிக்காவுடன் நேரடி பேச்சுவார்த்தையில் தற்போது ஈடுபடவில்லை என்று ஈரான் பலமுறை தெளிவுபடுத்தியுள்ளது. ஹோர்முஸ் நீரிணை தொடர்பான பேச்சுக்களை ஓமானுடன் மட்டுமே நடத்தி வருவதாக ஈரான் வெளியுறவு அமைச்சு உறுதிப்படுத்தியுள்ளது.

அமெரிக்காவின் பலத்த தாக்குதலைத் தவிர்த்து, இராஜதந்திரத்திற்கு ஒரு வாய்ப்பளிக்கும் வகையில் டிரம்ப் நடவடிக்கை எடுத்துள்ளதாக தெரிகிறது. எதிர்வரும் நாட்களில் இந்த பேச்சுவார்த்தைகள் ஒப்பந்தமாக உருவெடுக்குமா என உலக கண்கள் எதிர்பார்ப்புடன் காத்திருக்கின்றன.