இலங்கையில் சீரற்ற வானிலையால் 6 பேர் உயிரிழப்பு- ஒருவரை காணவில்லை!

இலங்கையின் சப்ரகமுவ மாகாணம், கண்டி மற்றும் நுவரெலியா மாவட்டங்களில் தற்போது நிலவும் சீரற்ற வானிலை காரணமாக பெரும் சேதம் ஏற்பட்டுள்ளது. இந்த கனமழை மற்றும் மண்சரிவு சம்பவங்களில் இதுவரை 6 பேர் உயிரிழந்துள்ளதாகவும், நீரில் மூழ்கி ஒருவர் காணாமல் போயுள்ளதாகவும் பொலிஸார் தெரிவித்துள்ளனர். மீட்புப் பணிகள் தொடர்ந்து நடைபெற்று வருகின்றன.

நேற்று (03) பெய்த கனமழையின் காரணமாக பொல்பிட்டிய, மொரஹேனேகம பகுதியில் அமைந்துள்ள வீடொன்றின் மீது திடீரென மண்மேடு சரிந்து விழுந்ததில் 3 பெண்கள் உட்பட 4 பேர் உயிரிழந்தனர். அந்த வீட்டிற்குள் சிக்கியவர்களே இவ்வாறு பலியானதாக பொலிஸார் தெரிவித்தனர். 

இதேபோல், நாவலப்பிட்டி சோலங்கந்த பகுதியில் உள்ள கடையொன்றின் மீது மண்மேடு சரிந்து விழுந்த விபத்தில் 67 வயதுடைய நபர் ஒருவர் உயிரிழந்தார். இந்த விபத்தைத் தொடர்ந்து நாவலப்பிட்டி - தொலஸ்பாகே வீதியின் 2ஆம் கம்பத்திற்கு அருகிலுள்ள பகுதி போக்குவரத்திற்கு முழுமையாக தடைப்பட்டுள்ளது.

மகாவலி கங்கையில் நிகழ்ந்த துயரச் சம்பவம் ஒன்றிலும் உயிரிழப்பு ஏற்பட்டுள்ளது. நேற்று மாலை வட்டவளை பொலிஸ் பிரிவுக்குட்பட்ட ஞானானந்தகம வீதியில் மகாவலி கங்கையின் குறுக்கே உள்ள பாலத்தின் மீது பயணித்துக் கொண்டிருந்த 53 வயதுடைய நபர் ஒருவர் தவறி நீரில் விழுந்து மூழ்கி உயிரிழந்தார். இவர் வட்டவளை பகுதியைச் சேர்ந்தவராவார்.

மேலும், நேற்று மதியம் கினிகத்தேனை பொலிஸ் பிரிவுக்குட்பட்ட அம்பகமுவ பகுதியில் பெய்த கனமழையால் வெள்ளப்பெருக்கு ஏற்பட்டது. அப்போது, வெள்ளத்தில் மூழ்கிய வீதியில் பயணித்த 45 வயதுடைய நபர் ஒருவர் வெள்ளப்பெருக்கில் அடித்துச் செல்லப்பட்டு காணாமல் போயுள்ளார். 

இவர் அம்பகமுவ பகுதியைச் சேர்ந்தவர் என்பது குறிப்பிடத்தக்கது. தொடர் மழை மற்றும் மண்சரிவு அபாயம் காரணமாக அப்பகுதி மக்கள் எச்சரிக்கையுடன் இருக்குமாறு அதிகாரிகள் அறிவுறுத்தியுள்ளனர்.