நோர்வே மீது டொனால்ட் ட்ரம்ப் கடும் விசனம்: தமக்கு எட்டு நோபல் சமாதானப் பரிசுகள் கிடைத்திருக்க வேண்டும் எனத் தெரிவிப்பு

தனக்கு நோபல் சமாதானப் பரிசை வழங்கத் தவறியமைக்காக நோர்வே மீது அமெரிக்க ஜனாதிபதி டொனால்ட் ட்ரம்ப் தனது கடுமையான விசனத்தை வெளியிட்டுள்ளார். தான் தீர்த்து வைத்த எட்டுப் போர்களுக்காக தமக்கு எட்டு அமைதிக்கான நோபல் பரிசுகள் வழங்கப்பட்டிருக்க வேண்டும் என்றும் அவர் உரிமை கோரியுள்ளார்.

நியூயோர்க்கின் சைராகியூஸ் நகரில் இடம்பெற்ற மக்கள் பேரணியில் உரையாற்றிய டொனால்ட் ட்ரம்ப், அணு ஆயுதம் ஏந்திய இந்தியாவிற்கும் பாகிஸ்தானுக்கும் இடையே யுத்தம் ஏற்படுவதைத் தடுத்து நிறுத்தியதன் மூலம் தாம் 50 மில்லியன் மக்களின் உயிர்களைக் காப்பாற்றியுள்ளதாகக் குறிப்பிட்டார். 

தமது தலைமையிலான அமெரிக்காவிற்கு இந்த விருது கிடைத்திருக்க வேண்டும் என்றும், இவ்வாறான அவமானகரமான முடிவை எடுத்தமை நோர்வே நாட்டின் மீது விழுந்த அழியாத கறை என்றும் அவர் சாடினார்.

ஜனநாயகத்திற்கு எதிரான மற்றும் நாகரிகத்தின் எதிரிகளாக விளங்கும் ஒருசில தீவிரவாதக் கொள்கையாளர்களினால் நோபல் சமாதானப் பரிசு நிரந்தரமாகத் தனது மதிப்பினை இழந்துவிட்டதாகக் குற்றம்சாட்டிய ட்ரம்ப், நோர்வே இந்த விருதை தமக்கு வழங்க மறுத்ததை ஒருபோதும் மறக்க மாட்டோம் எனவும் தெரிவித்தார்.

போர்க்குற்றங்கள் மற்றும் இனப்படுகொலைகளுக்கு எதிரான நீதி மற்றும் பொறுப்புக்கூறலை உறுதிப்படுத்தும் பணிகளுக்காக ஐக்கிய நாடுகள் மனித உரிமைகள் பேரவையின் முன்னாள் ஆணையாளரான தென்னாபிரிக்காவைச் சேர்ந்த நவி பிள்ளைக்கு இவ்வருடத்திற்கான நோபல் சமாதானப் பரிசு அறிவிக்கப்பட்டுள்ளது. 

எனினும், நவி பிள்ளையை எவரும் கேள்விப்படாத ஒரு நபர் என ட்ரம்ப் நிராகரித்துப் பேசியுள்ளார். ஐக்கிய நாடுகள் சபையில் பணியாற்றும் தாராளவாதக் கொள்கையுடைய ஒருவருக்கே இவ்விருது வழங்கப்பட்டுள்ளதாகவும், வாழ்த்துகளைத் தெரிவித்துக் கொள்வதாகவும் அவர் பரிகாசமாகக் குறிப்பிட்டார்.

தாம் முடிவுக்குக் கொண்டுவந்ததாகக் கூறும் சர்வதேச மோதல்களைப் பட்டியலிட்ட ட்ரம்ப், ஈரான் மற்றும் ரஷ்யா - உக்ரைன் தொடர்பான மேலும் இரு யுத்தங்களை முடிவுக்குக் கொண்டுவரத் தாம் பணியாற்றி வருவதாகக் கூறினார். வரலாற்றுச் சாதனை புரிந்தும் அமெரிக்காவிற்கு நோபல் அமைதிப் பரிசை வழங்காததை ஏற்றுக்கொள்ள முடியாது என்றும் அவர் மேலும் சுட்டிக்காட்டினார்.

ஈரான் அணு ஆயுதங்களைப் பெறுவதைத் தடுத்து நிறுத்தியதன் ஊடாக முழு மத்திய கிழக்கு மற்றும் ஐரோப்பாவை உள்ளடக்கிய பெரும் பேரழிவை தவிர்த்துள்ளதாகவும், வரலாற்றில் எவரும் காப்பாற்றிராத அளவுக்கு அதிக உயிர்களைத் தாம் காப்பாற்றியுள்ளதாகவும் ட்ரம்ப் வாதிட்டார்.

அமெரிக்க வரலாற்றில் தியோடர் ரூஸ்வெல்ட், உட்ரோ வில்சன், ஜிம்மி கார்ட்டர் மற்றும் பராக் ஒபாமா ஆகிய நான்கு முன்னாள் ஜனாதிபதிகள் நோபல் சமாதானப் பரிசைப் பெற்றுள்ளனர். குறிப்பாக, 2009 ஆம் ஆண்டு பராக் ஒபாமா தனது பதவிக் காலத்தின் முதல் ஆண்டிலேயே இவ்விருதைப் பெற்றதை ட்ரம்ப் தொடர்ச்சியாக விமர்சித்து வருவதுடன், எதுவுமே செய்யாத ஒருவருக்கே அன்று விருது வழங்கப்பட்டது எனவும் மீண்டும் சுட்டிக்காட்டியுள்ளார்.