போலந்தில் அடுத்தடுத்து இடம்பெற்ற பாடசாலைத் தாக்குதல்கள்: நாடு முழுவதும் 76 பேர் கைதுடன் 50,000 பாடசாலைகளில் பொலிஸ் சோதனை

போலந்தில் இவ்வார முற்பகுதியில் பாடசாலைகளை இலக்கு வைத்து நடத்தப்பட்ட அடுத்தடுத்த வன்முறைத் தாக்குதல்களைத் தொடர்ந்து, வன்முறைகள் மேலும் பரவுவதைத் தடுக்கும் நடவடிக்கையாக நாடு முழுவதும் 76 பேர் கைது செய்யப்பட்டுள்ளதுடன் சுமார் 50,000 பாடசாலைகளில் சோதனைகள் முன்னெடுக்கப்பட்டுள்ளதாக பொலிஸார் சனிக்கிழமை அறிவித்துள்ளனர்.

முன்னதாக இடம்பெற்ற இருவேறு தாக்குதல்களில் ஒருவர் உயிரிழந்தும் சிறுவர்கள் உள்ளிட்ட பலர் காயமடைந்தும் உள்ள நிலையில், நாடு முழுவதும் உள்ள பாடசாலைகளில் பாதுகாப்பு பலப்படுத்தப்பட்டுள்ளது.

வெள்ளிக்கிழமை பல கல்வி நிறுவனங்களில் பொலிஸ் ரோந்து நடவடிக்கைகள் தீவிரப்படுத்தப்பட்டதுடன், பாதுகாப்பு காரணங்களுக்காக சில பாடசாலைகளில் கல்வி நடவடிக்கைகள் இடைநிறுத்தப்பட்டன. இதனால் பல பெற்றோர்கள் தமது பிள்ளைகளைப் பாடசாலைகளுக்கு அனுப்பாது வீடுகளிலேயே தடுத்து வைத்திருந்தனர்.

மத்திய போலந்தின் மசோவியன் மாகாணத்தில் அமைந்துள்ள தொழிற்பயிற்சி பாடசாலை ஒன்றில் கடந்த புதன்கிழமை 19 வயதுடைய மாணவன் ஒருவன் கூரிய ஆயுதத்தால் சக மாணவர்கள், ஆசிரியர்கள் மற்றும் வீதியில் சென்றவர்கள் மீது தாக்குதல் நடத்தியதில் ஒன்பது பேர் காயமடைந்தனர். தாக்குதலை நடத்திவிட்டுத் தப்பியோட முற்பட்ட சந்தேகநபர் சம்பவ இடத்திற்கு அருகிலேயே பொலிஸாரால் கைது செய்யப்பட்டார். 

அதனைத் தொடர்ந்து வியாழக்கிழமை அதே மாகாணத்தில் உள்ள தனது பழைய பாடசாலைக்குச் சென்ற 15 வயது சிறுவன் ஒருவன் மேற்கொண்ட கத்திக்குத்துத் தாக்குதலில் பாடசாலைக் காவலாளி ஒருவர் உயிரிழந்ததுடன் மேலும் இருவர் படுகாயமடைந்தனர்.

போலந்து நாட்டவர்களினாலேயே மேற்கொள்ளப்பட்ட இந்தத் தாக்குதல்கள், சிறார்களால் நடத்தப்படும் இவ்வாறான வன்முறைகளுக்குப் பழக்கப்படாத அந்நாட்டு மக்களிடையே பெரும் அதிர்ச்சியை ஏற்படுத்தியுள்ளது. குறித்த தாக்குதல்கள் திட்டமிட்டு ஒருங்கிணைக்கப்பட்டவை என்றும், வெள்ளிக்கிழமை மேலும் பாரிய தாக்குதல்கள் முன்னெடுக்கப்படலாம் என்றும் சமூக வலைத்தளங்கள் மற்றும் பிரதான ஊடகங்கள் வாயிலாக வதந்திகள் பரவியதைத் தொடர்ந்து பாதுகாப்பு அச்சம் தீவிரமடைந்தது.

தலைநகர் வார்சோ அமைந்துள்ள மசோவியன் மாவட்டம் உட்பட நாடு முழுவதும் 59 பாடசாலைகள் முன்னெச்சரிக்கை நடவடிக்கையாக வெள்ளிக்கிழமை கல்வி நடவடிக்கைகளைத் தற்காலிகமாக இடைநிறுத்தின. நுழைவாயில்களில் மேலதிக ஊழியர்களைக் கடமையில் ஈடுபடுத்துதல் மற்றும் மாணவர்களின் பைகளை சுயவிருப்பத்தின் அடிப்படையில் சோதனைக்கு உட்படுத்துதல் போன்ற நடவடிக்கைகளை அதிபர்கள் அறிவித்துள்ளனர். இளைஞர்களின் பாதுகாப்பில் எந்தவித சமரசமும் செய்துகொள்ளப்பட மாட்டாது என அந்நாட்டு உள்துறை அமைச்சர் மார்சின் கியர்வின்ஸ்கி தெரிவித்துள்ளார்.

வெள்ளிக்கிழமை கைது செய்யப்பட்டவர்களில், மறைத்து வைக்கப்பட்ட கத்தி மற்றும் 11 பட்டாசுகளுடன் பிடிபட்ட வார்சோவைச் சேர்ந்த 14 வயது சிறுவன் மற்றும் பட்டாம்பூச்சி கத்தியுடன் பாடசாலைக்கு வந்த 16 வயது மாணவன் ஆகியோரும் அடங்குவர். ஏனைய சிலர் இணையத்தில் ஆயுதப் படங்களைப் பதிவேற்றியமை, சக மாணவர்களை அச்சுறுத்தியமை மற்றும் பாடசாலைத் தாக்குதல்கள் குறித்து மிரட்டல் விடுத்தமை தொடர்பில் தடுத்து வைக்கப்பட்டுள்ளனர்.

பாடசாலைத் தாக்குதல்களை ஊக்குவிக்கும் இணையவழி சவால்கள் எவையும் நடைமுறையில் உள்ளமைக்கான ஆதாரங்கள் இதுவரை கண்டறியப்படவில்லை என்றும், இவ்விரு சம்பவங்களுக்கும் இடையே நேரடித் தொடர்பு உள்ளமை உத்தியோகபூர்வமாக உறுதிப்படுத்தப்படவில்லை என்றும் அரசாங்கம் தெரிவித்துள்ளது. சந்தேகநபர்கள் இருவரும் தற்போது பொலிஸ் காவலில் உள்ளனர்.

இணையவழியில் பரவும் தீங்கிழைக்கும் உள்ளடக்கங்களைத் தடுப்பதற்கான சட்டமூலத்தை நிறைவேற்றுவதற்கான முயற்சிகள் தீவிரப்படுத்தப்படும் எனப் பிரதமர் டொனால்ட் டஸ்க் அறிவித்துள்ளார். அத்துடன் பாடசாலைகளில் தொடர்ந்தும் கூடுதல் பாதுகாப்பு ஏற்பாடுகள் முன்னெடுக்கப்படும் என்றும், நெருக்கடி முகாமைத்துவப் பயிற்சிகள் மாணவர்களுக்கும் பெற்றோர்களுக்கும் வழங்கப்படும் என்றும் அதிகாரிகள் தெரிவித்துள்ளனர்.

வியாழக்கிழமை தாக்குதலை மேற்கொண்ட 15 வயது சிறுவன், தனது நடவடிக்கைகளைப் பதிவுசெய்வதற்காக உடலில் கமராவைப் பொருத்தியிருந்த போதிலும், பாடசாலை அதிபர் கிறிஸ்டோப் ஒச்மான்ஸ்கியால் மடக்கிப் பிடிக்கப்பட்டார். அதன் பின்னர் தனது தவறின் விபரீதத்தை உணர்ந்த அந்தச் சிறுவன் தமக்கு உதவி செய்யுமாறு கோரியதாகவும், தன்னைக் கட்டிப்பிடிக்குமாறு கேட்டுக்கொண்டதாகவும் அதிபர் ஊடகங்களிடம் குறிப்பிட்டுள்ளார்.