டி20 உலகக் கோப்பைக்கான இந்திய அணி அறிவிப்பு எப்போது? நேரடி ஒளிபரப்பு குறித்த விவரம்!

2026-ம் ஆண்டு நடைபெறவுள்ள ICC T20 உலகக் கோப்பை மற்றும் நியூசிலாந்துக்கு எதிரான ஐந்து போட்டிகள் கொண்ட டி20 தொடருக்கான இந்திய கிரிக்கெட் அணி, வரும் டிசம்பர் 20, 2025 (சனிக்கிழமை) அன்று அறிவிக்கப்பட உள்ளது. 

மும்பை வான்கடே மைதானத்திற்கு அருகிலுள்ள பிசிசிஐ (BCCI) தலைமையகத்தில் அஜித அகர்கர் தலைமையிலான தேர்வுக் குழு கூடி இந்த வீரர்களைத் தேர்வு செய்யும்.

சமீபத்திய போட்டிகளில் பேட்டிங்கில் சூர்யகுமார் யாதவ் சற்று தடுமாற்றத்தைச் சந்தித்தாலும், அவரே உலகக் கோப்பைத் தொடரில் இந்திய அணியின் கேப்டனாக செயல்படுவார் என்பது உறுதி செய்யப்பட்டுள்ளது.

துணைக் கேப்டன் சுப்மன் கில் தற்போது பார்ம் அவுட்டில் இருப்பதோடு, கால் விரல் காயத்தாலும் பாதிக்கப்பட்டுள்ளார். இதனால் அவர் அணியில் இடம்பெறுவாரா அல்லது அவருக்குப் பதிலாக சஞ்சு சாம்சனுக்கு வாய்ப்பு வழங்கப்படுமா என்ற எதிர்பார்ப்பு எழுந்துள்ளது.

10-வது டி20 உலகக் கோப்பைத் தொடரானது 2026 பிப்ரவரி 7 முதல் மார்ச் 8 வரை இந்தியா மற்றும் இலங்கையில் உள்ள எட்டு மைதானங்களில் நடைபெறவுள்ளது.

இந்தியா, பாகிஸ்தான், அமெரிக்கா, நெதர்லாந்து மற்றும் நமீபியா ஆகிய அணிகளுடன் 'குரூப் A' பிரிவில் இடம்பெற்றுள்ளது. இந்தியா தனது முதல் ஆட்டத்தில் பிப்ரவரி 7-ம் தேதி மும்பையில் அமெரிக்காவை எதிர்கொள்கிறது.

கடந்த 24 மாதங்களில் விளையாடிய 46 போட்டிகளில் வெறும் 5 போட்டிகளில் மட்டுமே தோற்றுள்ள இந்திய அணி, 2024 டி20 உலகக் கோப்பையை வென்ற கையோடு இந்தத் தொடரிலும் பெரும் பலத்துடன் களமிறங்குகிறது.

இந்த அணி அறிவிப்பு மற்றும் செய்தியாளர் சந்திப்பை டிசம்பர் 20-ம் தேதி மதியம் சுமார் 1:30 மணியளவில் ஸ்டார் ஸ்போர்ட்ஸ் தொலைக்காட்சியிலும், ஜியோ ஹாட்ஸ்டார் (JioHotstar) செயலியிலும் நேரலையில் காணலாம்.

தற்போது தென் ஆப்பிரிக்காவுக்கு எதிரான டி20 தொடரில் இந்திய அணி 2-1 என்ற கணக்கில் முன்னிலையில் உள்ளது என்பதும் குறிப்பிடத்தக்கது.