சென்னையில் முதல்வர் விஜய்யுடன் ராகுல் காந்தி திடீர் சந்திப்பு: மதிய விருந்துடன் முக்கிய ஆலோசனை
சென்னையில் முதல்வர் ஜோசப் விஜய்யை மக்களவை எதிர்க்கட்சித் தலைவர் ராகுல் காந்தி நேரில் சந்தித்து இடைத்தேர்தல் வெற்றிக்கு வாழ்த்து தெரிவித்ததுடன் முக்கிய ஆலோசனை நடத்தினார்.
மக்களவை எதிர்க்கட்சித் தலைவரும் காங்கிரஸ் மூத்த தலைவருமான ராகுல் காந்தி, சென்னை பனையூரில் உள்ள தமிழக வெற்றிக் கழகத்தின் தலைவரும் தமிழக முதல்வருமான ஜோசப் விஜய்யின் இல்லத்திற்கு இன்று நேரில் சென்று சந்தித்துப் பேசினார்.
இல்லத்திற்கு வருகை தந்த ராகுல் காந்தியை முதல்வர் விஜய் பூங்கொத்து கொடுத்து வரவேற்றார். அப்போது, அண்மையில் நடைபெற்ற மதுராந்தகம் மற்றும் தாராபுரம் ஆகிய இரு சட்டமன்றத் தொகுதி இடைத்தேர்தல்களில் தவெக வெற்றி பெற்றதற்காக முதல்வர் விஜய்க்கு ராகுல் காந்தி வாழ்த்துகளைத் தெரிவித்தார்.
வரவேற்பைத் தொடர்ந்து, ராகுல் காந்திக்கு முதல்வர் விஜய் மதிய விருந்து அளித்தார். பின்னர் இருவரும் தனிப்பட்ட முறையில் முக்கிய ஆலோசனை மேற்கொண்டனர். இந்த ஆலோசனைக் கூட்டத்தில் காங்கிரஸ் அல்லது தவெக உள்ளிட்ட கூட்டணிக் கட்சிகளின் தலைவர்கள் யாரும் பங்கேற்கவில்லை.
இரு தலைவர்களுக்கும் இடையே விவாதிக்கப்பட்ட முழு விவரங்கள் உடனடியாக வெளியாகாத போதிலும், தவெக தலைமையிலான கூட்டணியின் தற்போதைய அரசியல் நிலவரங்கள் குறித்து ஆலோசிக்கப்பட்டதாகத் தெரிகிறது.
தமிழக சட்டமன்றப் பொதுத்தேர்தலின்போது திமுக கூட்டணியில் தேர்தலைச் சந்தித்த காங்கிரஸ், விசிக, இந்திய யூனியன் முஸ்லிம் லீக், இந்திய கம்யூனிஸ்ட், மார்க்சிஸ்ட் கம்யூனிஸ்ட் ஆகிய கட்சிகள் தேர்தல் முடிவுகளுக்குப் பின்னர் தமிழக வெற்றிக் கழகக் கூட்டணியில் இணைந்தன.
இதில் கம்யூனிஸ்ட் கட்சிகள் வெளியில் இருந்து ஆதரவு அளித்து வரும் சூழலில், இக்கூட்டணிக்கு மதச்சார்பற்ற சமூக நீதி வெற்றிக் கூட்டணி எனப் பெயரிடப்பட்டது. தற்போது டெல்லியில் சிறப்பு தீவிர திருத்தப் பணிக்கு எதிராக காங்கிரஸ் போராடி வரும் வேளையிலும், தமிழகத்தில் இடைத்தேர்தல் வெற்றிக்குப் பின்பும் இந்த சந்திப்பு நடைபெற்றுள்ளதால், கூட்டணியின் அடுத்தகட்ட நகர்வுகள் குறித்து இரு தலைவர்களும் தீவிரமாக விவாதித்திருக்கலாம் எனக் கருதப்படுகிறது.
