சஞ்சுவின் அதிரடியால் சரிந்த கில்லின் கோட்டை! IPL 2026-ல் சுப்மன் கில்லுக்கு இதுதான் கடைசி வாய்ப்பா?

இந்திய கிரிக்கெட்டின் அடுத்த சூப்பர் ஸ்டாராகக் கொண்டாடப்பட்ட சுப்மன் கில், தற்போது தனது டி20 வாழ்வின் மிகச்சவாலான கட்டத்தில் நிற்கிறார். ஒரு காலத்தில் தேர்வுக்குழுவின் முதல் தேர்வாக இருந்த கில், தற்போது சஞ்சு சாம்சனின் அசுர வளர்ச்சியால் ஓரங்கட்டப்பட்டுள்ளார். 

குறிப்பாக, கௌதம் கம்பீர் மற்றும் அஜித் அகர்கர் கூட்டணியின் கீழ் இந்திய அணி பின்பற்றி வரும் 'அச்சமற்ற ஆக்ரோஷ ஆட்டம்'  என்ற புதிய பாணிக்கு கில்லின் மெதுவான பேட்டிங் செட் ஆகவில்லை என்பதே கசப்பான உண்மை. 

உலகக்கோப்பை தொடரில் சஞ்சு சாம்சன் வெளிப்படுத்திய அபாரமான ஆட்டம், கில்லை நீக்கியது சரியான முடிவுதான் என்பதை உலகிற்கு உரக்கச் சொன்னது.

டெஸ்ட் மற்றும் ஒருநாள் போட்டிகளில் அசைக்க முடியாத வீரராகத் திகழும் கில்லுக்கு, சர்வதேச டி20 போட்டிகள் மட்டும் சிம்ம சொப்பனமாகவே இருந்து வருகிறது. 2024 முதல் 2025 வரையிலான காலகட்டத்தில் 23 போட்டிகளில் விளையாடிய கில், ஒரு அரைசதம் கூட அடிக்காமல் 132 என்ற குறைவான ஸ்ட்ரைக் ரேட்டில் தவித்தது தேர்வுக்குழுவை யோசிக்க வைத்தது. 

ஆஸ்திரேலியா மற்றும் தென்னாப்பிரிக்கா போன்ற சவாலான ஆடுகளங்களில் கில்லின் ஆக்ரோஷமான முயற்சி தோல்வியிலேயே முடிந்தது. ஆனால், அதே சமயம் IPL தொடர்களில் கில்லின் பேட்டிங் மிரட்டலாகவே இருந்துள்ளது. கடந்த மூன்று சீசன்களில் 154 ஸ்ட்ரைக் ரேட்டில் ரன் குவித்த கில்லால், அதே மேஜிக்கை ஏன் நீல நிறச் சட்டையில் செய்ய முடியவில்லை என்பது மில்லியன் டாலர் கேள்வியாக உள்ளது.

தற்போது நடைபெறவுள்ள IPL 2026 தொடர் சுப்மன் கில்லுக்கு ஒரு வாழ்வா-சாவா போராட்டமாகும். மீண்டும் இந்திய அணிக்குள் நுழைய வேண்டுமானால், இந்த சீசனில் அவர் குறைந்தது 160-க்கும் அதிகமான ஸ்ட்ரைக் ரேட்டில் விளையாடித் தீர வேண்டும். ஆனால், அவர் பார்முக்குத் திரும்பினாலும் சஞ்சு சாம்சனை முந்துவது எளிதல்ல. 

உலகக்கோப்பை நாக் அவுட் போட்டிகளில் 97*, 89 எனத் தொடர் நாயகன் விருது வென்ற சஞ்சுவை அணியிலிருந்து நீக்குவது என்பது இப்போதைக்குச் சாத்தியமில்லாத ஒன்று. ஓப்பனிங்கில் அபிஷேக் ஷர்மாவின் அதிரடி, மிடில் ஆர்டரில் சஞ்சுவின் கிளாஸ் என இந்திய அணி வலுவாக உள்ள நிலையில், கில் தனது ஆட்ட பாணியை மொத்தமாக மாற்றினால் மட்டுமே மீண்டும் டி20 அணியில் இடம் பிடிக்க முடியும்.