WI vs NEP: நேபாளத்தை நசுக்கிய வெஸ்ட் இண்டீஸ் – சூப்பர் 8க்கு தகுதி பெற்ற முதல் அணி!

2026 டி20 உலகக்கோப்பை தொடரில் நேபாள அணிக்கு எதிரான போட்டியில் வெஸ்ட் இண்டீஸ் அணி அபார ஆட்டத்தை வெளிப்படுத்தி 9 விக்கெட் வித்தியாசத்தில் மிகப்பெரிய வெற்றியைப் பதிவு செய்தது. இந்த வெற்றியின் மூலம் தொடர்ச்சியாக மூன்றாவது வெற்றியை பெற்ற வெஸ்ட் இண்டீஸ், நடப்பு உலகக்கோப்பையில் சூப்பர் 8 சுற்றுக்கு முன்னேறிய முதல் அணியாக மாறியுள்ளது.

மும்பையில் நடைபெற்ற இந்தப் போட்டியில் வெஸ்ட் இண்டீஸ் பந்துவீச்சும் பேட்டிங்கும் இரண்டிலும் முழு ஆதிக்கம் செலுத்தியது. டாஸ் வென்று முதலில் பந்துவீச்சை தேர்வு செய்த அவர்கள், நேபாளத்தை ஆரம்பத்திலேயே அழுத்தத்தில் தள்ளினர்.

முதல் ஓவரிலேயே அகீல் ஹொசைன் விக்கெட் வீழ்த்தியதால் நேபாளம் தடுமாறியது. பின்னர் மேத்யூ ஃபோர்டு துல்லியமான பந்துவீச்சால் அழுத்தத்தை அதிகரித்தார். பவர் பிளே முடிவில் நேபாளம் 3 விக்கெட்டுக்கு 22 ரன்கள் மட்டுமே எடுத்தது.

அதன்பின் அனுபவம் மிக்க ஜேசன் ஹோல்டர் களமிறங்கி விக்கெட்டுகளை அள்ளினார். அவர் 4 ஓவர்களில் 27 ரன்கள் மட்டுமே வழங்கி 4 முக்கிய விக்கெட்டுகளை கைப்பற்றி நேபாளத்தின் முன்னேற்றத்தை முற்றிலும் தடுத்தார்.

ஒருபுறம் விக்கெட்டுகள் சரிந்தபோதும் தீபேந்திர சிங் ஐரி மட்டும் தனிப்பட்ட போராட்டம் நடத்தினார். பொறுப்புடன் விளையாடிய அவர் இறுதியில் அதிரடி காட்டி 58 ரன்கள் எடுத்ததால் நேபாளம் 20 ஓவர்களில் 8 விக்கெட்டுக்கு 133 ரன்கள் என்ற போராடக்கூடிய இலக்கை நிர்ணயித்தது.

134 ரன்கள் என்ற இலக்கை நோக்கி களமிறங்கிய வெஸ்ட் இண்டீஸ் அணிக்கு பிராண்டன் கிங் மற்றும் கேப்டன் ஷாய் ஹோப் சிறந்த தொடக்கத்தை வழங்கினர். கிங் அவுட்டான பின்னரும் ஹோப்–ஹெட்மயர் கூட்டணி ஆட்டத்தை கட்டுப்பாட்டில் வைத்தது.

சிறந்த ஃபார்மில் உள்ள ஷிம்ரன் ஹெட்மயர் 46 ரன்கள் எடுத்தார். கேப்டன் ஷாய் ஹோப் நிதானமான அரைசதத்துடன் 61 ரன்கள் எடுத்து இறுதி வரை அவுட்டாகாமல் இருந்தார்.

இறுதியில் வெஸ்ட் இண்டீஸ் அணி 16வது ஓவரிலேயே ஒரு விக்கெட் இழப்பில் இலக்கை எட்டி, நேபாளத்தின் சூப்பர் 8 கனவை முடிவுக்கு கொண்டு வந்தது. தொடர்ந்து மூன்று வெற்றிகளுடன் வெஸ்ட் இண்டீஸ் சூப்பர் 8 சுற்றுக்கு முன்னேறி பலம் காட்டியுள்ளது.