விஜய் செல்லுமிடமெல்லாம் இருக்கும் இந்த பையன் யார் தெரியுமா?

தமிழ்நாடு முதலமைச்சராகப் பொறுப்பேற்ற பின்னர் முதல் முறையாக நேற்று முதலமைச்சர் விஜய் டெல்லிக்குப் பயணம் சென்றார். சென்னையில் இருந்து தனி விமானம் மூலம் புறப்பட்ட அவருக்கு டெல்லியில் காவல் துறை அணிவகுப்பு மரியாதை வழங்கப்பட்டது. பின்னர் தமிழ்நாடு இல்லத்தில் ஓய்வெடுத்துவிட்டு, மாலை 4.30 மணியளவில் பிரதமர் நரேந்திர மோடியை அவரது அலுவலகத்தில் சந்தித்தார்.

இந்தப் பயணத்தின் போது, முதலமைச்சர் விஜய்யுடன் தொடர்ந்து ஒரு இளைஞர் இருந்தது ரசிகர்கள் மற்றும் பொதுமக்களின் கவனத்தை ஈர்த்தது. அவர் யார், ஏன் எப்போதும் விஜய்யுடன் இருக்கிறார் என்ற கேள்வி எழுந்தது.

தற்போது வெளியாகியுள்ள தகவலின்படி, அந்த இளைஞரின் பெயர் ஜெகதீஷ். அவர் விஜய்யின் தனிப்பட்ட ஹேர் ஸ்டைலிஸ்ட் ஆவார். அண்மையில் முதலமைச்சராக விஜய் பதவியேற்ற நிகழ்வில், அவருக்கு சிகை அலங்காரம் செய்தது இவர்தான். பிரதமரைச் சந்திக்கும் டெல்லி பயணத்திலும் இவர் உடன் சென்ற வீடியோ காட்சிகள் வெளியாகியுள்ளன.

இதுகுறித்து இந்தியன் எக்ஸ்பிரஸ் தளத்திற்கு ஜெகதீஷ் அஸ்வதி அளித்த பேட்டியில் கூறியதாவது:

"எனக்கு 10-ம் வகுப்பு படிக்கும் போதிலிருந்தே சினிமாவில் பணியாற்ற வேண்டும் என்பதுதான் ஆசை. அதற்கான படிப்புகளை முடித்து, சலூன்களில் வேலை பார்த்து, முன்னணி ஹேர் ஸ்டைலிஸ்டுகளிடம் உதவியாளராகப் பணியாற்றிய பிறகு, மெல்ல மெல்ல என்னைப் பற்றிய தகவல் பரவியது.

அப்படி 'பிகில்' திரைப்படத்தின் போது விஜய் சாரைச் சந்திக்கும் வாய்ப்பு எனக்குக் கிடைத்தது. அதன்பிறகு 'மாஸ்டர்', 'பீஸ்ட்', 'வாரிசு', 'லியோ', 'தி கோட்' மற்றும் இன்னும் வெளியாகாத 'ஜனநாயகன்' உள்ளிட்ட விஜய்யின் அனைத்துத் திரைப்படங்களிலும் கடந்த 8 ஆண்டுகளாகப் பணிபுரிந்து வருகிறேன்.

'மாஸ்டர்' படப்பிடிப்பு முடிந்த தருணம் எனக்கு இன்னும் நினைவிருக்கிறது. அப்போது விஜய் சார் என்னிடம், 'வெல்டன் தம்பி!' என்று கூறி என்னைப் பாராட்டினார். அந்த தருணம் எனக்கு மிகவும் ஸ்பெஷலானது."

இவ்வாறு ஜெகதீஷ் தெரிவித்துள்ளார். முதலமைச்சர் விஜய், தனது திரைப்படக் காலத்திலிருந்து தொடர்ந்து ஜெகதீஷிடம் சிகை அலங்காரம் செய்துகொள்வது குறிப்பிடத்தக்கது. இப்போது அரசியல் பயணங்களிலும் அவர் உடன் சென்று விஜய்யின் தோற்றத்தைப் பளிச்சென்று வைத்திருப்பதில் கவனம் செலுத்தி வருகிறார்.