சுகாதாரச் செயலர் வெஸ் ஸ்ட்ரீட்டிங் ராஜினாமா? கெய்ர் ஸ்டார்மருக்கு லேபர் கட்சிக்குள் புதிய சிக்கல்

பிரித்தானிய அரசியலில் புதிய பரபரப்பு உருவாகியுள்ளது. லேபர் கட்சியின் முக்கிய தலைவரும் சுகாதாரச் செயலருமான Wes Streeting, தனது பதவியை ராஜினாமா செய்து பிரதமர் பதவிக்கான போட்டியில் களமிறங்க உள்ளதாக தகவல்கள் வெளியாகியுள்ளன.

சமீபத்தில் நடைபெற்ற உள்ளூராட்சி தேர்தல்களில் லேபர் கட்சி சுமார் 1,500 இருக்கைகளை இழந்ததைத் தொடர்ந்து, பிரதமர் Keir Starmer மீது கட்சிக்குள் அதிருப்தி அதிகரித்துள்ளதாக கூறப்படுகிறது. இதனால், அவரது தலைமையைக் குறித்து கேள்விகள் எழுந்துள்ளன.

இதற்கிடையில், ஸ்டார்மரின் தலைமையை சவாலுக்கு உட்படுத்தி, கட்சியின் தலைமைப் பதவியை கைப்பற்ற வெஸ் ஸ்ட்ரீட்டிங் முயற்சி செய்து வருவதாக பிரித்தானிய ஊடகங்கள் செய்தி வெளியிட்டன.

ஆரம்பத்தில் இந்த தகவல்களை அவரது நெருங்கிய வட்டாரங்கள் மறுத்திருந்தாலும், தற்போது அவர் விரைவில் தனது அமைச்சுப் பொறுப்பில் இருந்து விலகி அதிகாரப்பூர்வமாக தலைமைப் போட்டியில் இறங்கத் தயாராக இருப்பதாக தகவல்கள் தெரிவிக்கின்றன.

பிரித்தானிய அரசியல் நடைமுறையின்படி, ஆளும் கட்சியின் தலைவரே பிரதமராக பதவி வகிப்பார். எனவே, லேபர் கட்சியின் தலைமைப் போட்டி நேரடியாக பிரதமர் பதவிக்கான போட்டியாகவே பார்க்கப்படுகிறது.

ஆனால், கட்சித் தலைமைக்கு போட்டியிட தேவையான 81 நாடாளுமன்ற உறுப்பினர்களின் ஆதரவு தற்போது ஸ்ட்ரீட்டிங்கிடம் இல்லை என பிரதமர் அலுவலக வட்டாரங்கள் கூறியுள்ளன. அதே நேரத்தில், அவரது ஆதரவாளர்கள், எம்.பிக்களின் எழுத்துப்பூர்வ ஆதரவு வெளிவரும் வரை உண்மையான ஆதரவு நிலை யாருக்கும் தெளிவாக தெரியாது என்றும், ஸ்ட்ரீட்டிங்குக்கு போதுமான ஆதரவு இருப்பதாக அவர் நம்புவதாகவும் தெரிவித்துள்ளனர்.

இந்த சூழ்நிலை, ஏற்கனவே தேர்தல் பின்னடைவை சந்தித்துள்ள கெய்ர் ஸ்டார்மருக்கு புதிய அரசியல் சிக்கலை உருவாக்கியுள்ளது.